Toe Arendsvlei se eerste episode op 1 Oktober 2018 op kykNET&Kie uitgesaai is, was dit ’n eerste van sy soort. Ja, daar was al voorheen telenovelas, maar beslis nie ’n oorspronklike Afrikaanse produksie nie. En ook nog nie een wat op die Kaapse Vlakte uitspeel nie.
Daar was niks oortollige glam nie, geen spoggerige buurt of groot besighede nie. Ons is eerder gegroet deur doodgewone mense in ’n alledaagse buurt. En dis hul stories waarby kykers aanklank gevind het. Natuurlik was daar nie ’n tekort aan drama, spanning, liefdesdriehoeke en skurke nie, maar ons verwag mos niks minder van ’n sappige telenovela nie!
Arendsvlei het met drie episodes ’n week begin, en later vier dae ’n week begin uitsaai. Kykers het egter dikwels op sosiale media gevra of dit nie maar asseblief vyf dae ’n week kan uitsaai nie. Maar, met dié dat Arendsvlei oorspronklik net ’n jaar op die kassie sou wees, was meer as vier episodes ’n week niks meer as ’n wens nie.
Daai een jaar het in ses verander, en dis met die einde van die sesde seisoen dat kykers dié telenovela en die mense van die Vlei moet groet.
Voordat die son finaal op Arendsvlei sak, deel Penguin Films, wat die reeks vervaardig het, van die interessantste feite en syfers van die program wat die weg vir ander plaaslike telenovelas gebaan het.
Hoeveel troues was daar tydens die reeks en wie se troue was die duurste en mees uitspattig?
Die mense in die Vlei was besig en daar was amper een troue vir elke jaar! Daar was altesaam vyf troues.
Hierdie paartjies het voor die kansel gestaan: Ronel en Thys, Lee-Roy en Wesley, Janice en Lionel, Ayesha en Langes, en Angel en Priester.
Ayesha en Langes se troue was die uitspattigste troue en Lee-Roy en Wesley se troue die duurste.
Watter tonele het die langste geneem, en was die moeilikste om te skiet?
Anton se ongeluk, Adam se dood op die kamp, Steve en Woelag se dood by die swembad, die hoftonele en ál die troues was die moeilikste tonele om te skiet en het ook die langste geneem om te verfilm.
Hoeveel begrafnisse was daar op Arendsvlei?
Daar was sewe keer begrafnis gehou (vir Anton Venter, Clint Smit, Steve Mortlock, Ayesha Noor, David Abrahams, Monique Ross en Ronel Cupido). Daar was meer sterftes, maar daar is nie vir almal begrafnis gehou nie.
Het die reeks toekennings oor die afgelope ses jaar gewen?
Arendsvlei het drie Safta-toekennings gewen. Roberto Kyle vir beste akteur in ’n telenovela in 2020, Beatrix van Zyl vir beste kunsregie in ’n telenovela in 2020, en Shaleen Surtie-Richards vir beste byspeler in ’n telenovela in 2022.
By die 2023 Silwerskermfees-toekennings het Arendsvlei twee toekennings opgeraap: Devonecia Swartz vir beste nuweling in ’n telenovela of sepie en Dann-Jacques Mouton vir beste akteur in ’n telenovela of sepie.
Hoeveel van die rolverdeling is opgelei om agter die kameras as regisseurs te werk?
Vier! Hulle is: Roxanne Blaise, Jarrid Geduld, Roberto Kyle en Bobby Stuurman.
Watter karakter het die meeste tyd in hare en grimering spandeer?
Audrey Galant vertolk deur Taryn Hess.
Wie het die danse vir al die dansvertonings/kompetisies ge-choreografeer?
Melissa de Vries wat die rol van Sasha Daniels vertolk.
Wie was die jongste akteur op stel?
Baba Rhoné was twee maande oud toe sy haar debuut op Arendsvlei as Lee-Roy en Anna se baba gemaak het.
Is Arendsvlei by ’n regte skool geskiet en het hulle enige van die skoolkinders as ekstra’s gebruik?
Ja! Dit is by die Axios Vaardigheidskool in Eersterivier geskiet. Al die ekstras in die skooltonele was leerders van dié skool.
Op hoeveel plekke (buite die ateljee) het hulle tydens die reeks geskiet?
Oor die ses seisoene is die reeks by ongeveer 121 locations verfilm.
Hoeveel crew-lede en akteurs het gedurende die ses seisoene aan die produksie gewerk?
Meer as 610 rolverdelingslede (ekstras uitgesluit) en min of meer 350 mense wat as deel van die crew gewerk het.
Arendsvlei is elke Maandag tot Donderdag op kykNET & kie (DStv-kanaal 145, ook op DStv Stream) om 19:30 te sien. Dit is ook op Catch Up beskikbaar.
