Die afgelope vier seisoene van die gewilde speletjiesprogram Wie word ’n miljoenêr? het meegevoerde kykers tuis die antwoorde laat uitskree wanneer deelnemers hul kanse in die opmars na die R1 miljoen-vraag verbrou het. So naby, en tog so, so ver…
En die groot vraag natuurlik: Gaan iemand weer soos in die vorige seisoen met die volle R1 miljoen huiswaarts keer?
Sedert Wie word ’n miljoenêr? vir die eerste keer in 2021 op kykNET begin het, was daar nog net een speler wat die volle R1 miljoen in sy sak kon steek. Dit was Herman Bosman, die blommeboer van George, wat in die twaalfde episode van die vierde seisoen sy laaste hulplyn ingespan het: sy ma. Die vraag vir Herman se R1 miljoen-prysgeld het gehandel oor watter reliek wat in Parys se Notre Dame-katedraal bewaar word, ongeskonde was ná die verwoestende 2019-brand. Ma Vida het gesê dat dit die doringkroon was. Sy was korrek.
In die nuwe seisoen, wat in Julie begin, is daar ook weer ’n episode met bekendes wat hul algemene kennis gaan inspan om fondse vir liefdadigheid te wen. Hulle is Karlien van Jaarsveld, Dean Smith, Jannie du Plessis, Pietie Beyers, Nicole Holm en Tracey-Lee Oliver. In die tweede seisoen het die akteur en komediant Melt Sieberhagen R250 000 aan die Gift of the Givers gegee.
Ná afloop van die vyfde seisoen sal daar 201 spelers wees wat weet hoe dit voel om in daai warm stoel te sit.
Wie word ’n miljoenêr? saai vanaf Woensdag, 2 Julie 2025, om 20:00 op kykNET en DStv Stream (DStv-kanaal 144) uit. Episodes sal ook ná uitsending op Catch Up beskikbaar wees.
Lees ook
Van Leeroy in ‘Arendsvlei’ tot dr. Joe in ‘Binnelanders’: Roberto Kyle se nuwe hoofstuk in die stad van Goud
‘Die nuusmakers’, ‘The Newsroom’, ‘Spotlight’ en meer – kyk dié spanningsvolle stories vir ’n blik op die wêreld van nuus
