Wat om te kyk op TV en aanlyn te stroom hierdie week – hier is ons top-keuses vir 9 tot 15 Oktober.
Neem asseblief kennis dat datums en titels moontlik kan verander.
Son of a Critch S2
Vanaf 11 Oktober 2023 op Showmax.
In die tweede seisoen van die hartverwarmende en skaterlag-snaaks Son of a Critch, begin die nuwe skooljaar met nuwe uitdagings vir die tiener Mark Critch. Daar’s sy eerste fight, sy eerste bier… en selfs sy eerste paar jeans (wie op aarde onthou hul eerste paar jeans?!). Maar hoe groter geliewe Mark se lewe raak, hoe meer gekompliseerd raak dinge ook.
Die storie is gegrond op die gelyknamige memoir deur die akteur en TV-skepper Mark Critch en vertel oor sy grootwordjare in die 1980’s as ’n tiener in Kanada se Newfoundland en Labrador. Terwyl Benjamin Evan Ainsworth (Pinocchio) die jong Mark vertolk, is die werklike Mark ook in die rolverdeling as sy pa. Malcolm McDowell (A Clockwork Orange) speel sy oupa.
Die eerste seisoen het volpunte op die resensiewebwerf Rotten Tomatoes en is reeds vir ’n derde seisoen hernu.
John Doyle van The Globe & Mail skryf: “In ’n reeks wat probeer om ’n delikate balans tussen humor en hartverwarmende oomblikke te vind, is dit die suiwer pret wat jou vasgenael hou.
Lottoland help ’n dorp
Woensdae vanaf 11 Oktober 2023 om 21:00 op kykNET en DStv Stream (kanaal 144).
Lottoland help ’n dorp is ’n spin-off van die gewilde reeks Dankie, Lottoland.
In die nuwe reeks, wat aangebied word deur die sangeres en vermaaklikheidster Leah, word 13 dorpe reg oor Suid-Afrika besoek om mense met ’n plan om hul gemeenskap te verbeter te vind – en dan met daardie droom by te staan. Wanneer Leah, wat ook ’n voormalige Boer Soek ’n Vrou-aanbieder is, die gekose dorpe besoek, lei sy hulle aanvanklik om die bos… Terwyl die betrokke organiseerders dink hulle is deel van die oudisie-rondes, is hulle eintlik reeds gekies om deel van Lottoland help ’n dorp
te wees.
kykNET Storiefilms
Saterdae vanaf 20:00 op kykNET en DStv Stream (kanaal 144).
In Oktober is daar nie net herhalings van die gewildste Storiefilms nie, maar ook van die beste kortfilms en dokumentêre wat vanjaar by die Silwerskermfees te sien was.
Vandeesweek, op 14 Oktober, lyk die line-up só:
Nommer 5, ’n komedie oor ’n familie wat elke jaar op dieselfde plek kamp. Met Marion Holm, Chris van Niekerk, Ludwig Binge en Amalia Uys. Om 20:00.
’n Gids vir Louzanne, ’n inspirerende dokumentêre film oor die paralimpiese-atleet Louzanne Coetzee en die gidse wat deur die jare saam met haar gehardloop het. Om 20:45.
’n Doop om stilte, ’n kortfilm oor Joshua, ’n graad 8-leerling en die aand van sy ontgroening by ’n seunshoërskool. Met Tiaan Luyt, Darren Cloete en Jan Combrink. Dit is as die beste kortfilm by vanjaar se Silwerskermfees aangewys. Om 21:30.
Lessons in Chemistry
Vanaf 13 Oktober 2023 op Apple TV+ beskikbaar om te stroom.
Dié reeks, gegrond op die gelyknamige boek deur die skrywer Bonnie Garmus. Die boek, wat in 2022 gepubliseer is, is reeds in sowat 40 verskillende tale beskikbaar. Die gewildheid van die boek, wat etlike weke bo-aan die New York Times se topverkoperlys geboer het, het gou gelei tot die skep van ’n TV-reeks waarin die Oscar-wenner Brie Larson (Room, Captain Marvel) die hoofrol vertolk.
Die storie speel af in die vroeë 1950’s en volg Elizabeth Zott (Larson), wie se droom om ’n wetenskaplike te wees danksy ’n stifling patriargale samelewing aan skerwe lê. As sy dan van haar werk by ’n lab afgedank word, begin sy ’n nuwe rol as die aanbieder van ’n kookprogram op televisie. Dit word gou veel groter as net ’n “kookprogram” as sy dan vir kykers – vroue én mans – oor meer as net resepte leer.
Ook in die rolverdeling tel Lewis Pullman (Top Gun: Maverick), Aja Naomi King (How to Get Away with Murder), Stephanie Koenig (The Flight Attendant), en Thomas Mann (Me and Earl and the Dying Girl).
The Fall of the House of Usher
Vanaf 12 Oktober 2023 op Netflix.
Dié gotiese gruweldrama deur Mike Flanagan is losweg gegrond op die gelyknamige kortverhaal, asook ander werke, deur Edgar Allan Poe. Flanagan is wyd bekend vir sy eiesoortige take op die horror genre en sy vermoë om met min moeite en geweldige gesag, angswekkende stories te skep. Onder sy top-skeppings is die gruwelike treffer Midnight Mass, The Haunting of Hill House en The Haunting of Bly Manor.
Met The Fall of the House of Usher het Flanagan weereens iets goddeloos geskep. In sy weergawe van Poe se skrywe draai die storie om die gewetenlose broer en suster Roderick en Madeline Usher. Dié twee het oor die jare ’n reuse-sakeryk gebou. Fortunato Pharmaceuticals is ’n drukkoker van massiewe rykdom en mag, maar dit als begin verkrummel as verborge geheime aan die lig kom en hul erfgename een ná die ander sterf…
Big Vape: The Rise and Fall of Juul
Vanaf 11 Oktober 2023 op Netflix.
Juul was op ’n tyd die maatskappy wat die vinnigste groei ter wêreld en in die geskiedenis ervaar het. Deesdae is dit eerder ’n cautionary tale.
Netflix se dokkiereeks is gegrond op die boek Big Vape: The Incendiary Rise of Juul deur die TIME-joernalis, Jamie Ducharme. Dit lê oor vier episodes die gebeure bloot wat tot die opgang en sukses van die kleine vaping-toestel gelei het – en ook tot sy ewe vinnige val.
Ook nuut hierdie week:
Vanaf 9 Oktober 2023:
Chocolate City, Showmax
Daddy’s Home 1 & 2, Showmax
Jan Braai Vir Erfenis S13, Showmax
Oppiestoep S8, Showmax
Shutter Island, Showmax
Stranded with my Mother-in-Law, Netflix
Vanaf 10 Oktober 2023:
DI4RIES: S2 Deel 1, Netflix
Last One Standing S2, Netflix
Vanaf 11 Oktober 2023:
Blacklist S10, Woensdae om 21:00 op M-Net en DStv Stream (kanaal 101)
Pact of Silence, Netflix
Once Upon a Star, Netflix
Vanaf 12 Oktober 2023:
Angry Neighbours, Showmax
Game of Love, Showmax
Gemini Man, Showmax
Hostel, Showmax
The Hotwives of Las Vegas, Showmax
Op Reis Met My Beste Vriend S1, Showmax
The Visitor, Showmax
GOOD NIGHT WORLD, Netflix
Vanaf 13 Oktober 2023:
Magnum PI S5, Vrydae om 19:00 op M-Net en DStv Stream (kanaal 101)
Ijogbon, Netflix
The Conference, Netflix
Everybody Loves Diamonds S1, Prime Video
Vanaf 15 Oktober 2023:
Camp Courage, Netflix
