Talia Davis se Arendsvlei-karakter was ’n regte terroris toe sy in seisoen vyf haar verskyning in die Vlei maak. Abigail wou niks van haar lank verlore pa, Clint (Clayton Evertson), se verhouding met Beatrice (Jolene Martin) weet nie en het Beatrice se lewe in ’n nagmerrie verander. Sy het Beatrice amper haar verhouding – en lewe – gekos. Die tonge het behoorlik op sosiale media geklap soos kykers vir Abigail weggewens het. Talia Davis ‘dankbaar’ vir ‘Arendsvlei’ se Abi: ‘Ek het op ’n dieper vlak met haar connect’
Maar hoe meer die tonge geklap het, hoe meer het dit vir dié jong aktrise gerusgestel dat sy op die regte pad is met haar karakter en toneelspel. Anders as haar karakter was Talia glad nie so voorbarig en uitgesproke as kind nie en dit is presies hoekom haar ouers haar by dramaklasse ingeskryf het.
“Ek was maar vyf jaar oud toe ek met drama klasse begin het. My ma wou nie hê dat my skaamheid en lae selfvertroue my geleenthede in die toekoms moes affekteer nie,” vertel Talia.
Haar dramaskool het hul eie agentskap gehad en met hul bystand het Talia in 2014 haar eerste rol in ’n fliek losgeslaan het, As ek huis toe kom, wat later op kykNET&Kie uitgesaai is.
“Ek was so opgewonde, maar het ’n rukkie daarna vir eers met acting opgehou om op my skoolloopbaan te fokus,” vertel Talia.
‘Suidooster’-verrassing
Sy het ná skool filmproduksie en video-tegnologie ge-swot, omdat sy nie net van die werk voor die kamera gehou het nie, maar van agter die skerms ook. As deel van haar kursus op universiteit, moes sy ’n internskap doen. Sy het ’n geleentheid by die gewilde sepie, Suidooster gekry, maar in plaas daarvan dat sy net die tricks agter die kamera leer, het hulle vir haar in 2021 ook voor die kamera in die rol van Veronqiue gesit.
As aktrise was Abigail vir my ’n groot leerskool. Ek is so dankbaar vir hierdie geleentheid op my droomreeks en ek is veral dankbaar vir hierdie karakter wat so baie vir my beteken het.
Talia Davis
“Veronique het nes Abigail amok gemaak. Sy was ’n regte busy body wat haar neus in almal se sake gedruk het,” vertel sy.
“Ek is mal oor karakters wat ’n bietjie anders en complicated is. Dit is vir my verskriklik lekker om karakters te vertolk wat my uit my comfort zone dwing.”
In 2023 was sy deel van die kykNET Silwerskermfees-speelfilm, Old Righteous Blues, maar haar loopbaanhoogtepunt tot dusver is beslis die rol van Abigail.
Droom word waar
“Ek wou nog altyd deel van Arendsvlei wees. Ek was ’n groot aanhanger van die telenovela en het daarvan gedroom om deel te wees van die rolverdeling. Dit het soos ’n vibe gelyk en daar is min reekse met so baie jongmense. Baie van die ander reekse het ’n ouer rolverdeling. Ek het ook gedink dit sal amazing wees om deel te wees van ’n reeks wat die coloured-kultuur en -stories vier.”
Sy het eers oudisie vir die rol van Judy, maar Simone Neethling het toe dié rol gekry. Toe die rol van Abigail later beskikbaar raak, het Talia en haar agent saamgestem dat Abigail waarlik vir haar bedoel is.
“Sy is netso sassy en soms sarkasties soos ek, maar ek het op ’n dieper vlak met hierdie karakter connect,” vertel sy.
“My pa is ook skielik in 2018 oorlede en toe Abi vir Clint verloor, het dit so baie emosies teruggebring. Dit het my as aktrise regtig gepush, al was dit persoonlik baie moeilik en uitputtend om van daardie tonele te skiet. Nes Abi het ek ook vir ’n lang tyd gehuil en gesukkel om my pa se dood te aanvaar.”
Vir Talia was Abigail ’n komplekse karakter, maar een saam met wie sy baie kon groei.
“As akteur kry jy nie sommer ’n karakter met so baie character growth nie, maar met Abigail was daar so baie lae om te skil. Ek het saam met haar gegroei en as aktrise was Abigail vir my ’n groot leerskool. Ek is so dankbaar vir hierdie geleentheid op my droomreeks en ek is veral dankbaar vir hierdie karakter wat so baie vir my beteken het.”
Ek is mal oor karakters wat ’n bietjie anders en complicated is. Dit is vir my verskriklik lekker om karakters te vertolk wat my uit my comfort zone dwing.
Talia Davis
Koebaai Abi, dis tyd vir Amber
Nou is Talia gereed vir haar volgende uitdaging as Amber in Penguin Films se splinternuwe telenovela, Skemergrond, wat vanaf 1 Julie in Arendsvlei se plek op kykNET&kie te sien is.
“Amber is heeltemal anders as Abigail en dit is wat dit so uitdagend gemaak het toe ek by albei moes werk. Ek het Skemergrond begin skiet toe ek nog besig was met Arendsvlei en daar was baie dae in die begin toe ek in die oggend op die een stel geskiet het en toe die middag op die ander stel moes skiet. Vir ’n paar weke het ek nie geweet of ek kom of gaan nie. Ek het ook nie geweet wie of wat ek is nie,” vertel sy laggend.
Die karakters verskil soos dag en nag en waar Abigail glad nie emosioneel geraak het nie, gebruik Talia baie meer emosies om Amber te vertolk. Amber is ook baie meer volwasse as Abigail.
“Sy is steeds ’n tiener, maar weens omstandighede moes sy vinnig groot word. Ek word later vanjaar 24, so my tienerjare was nie te lank gelede nie en ek dink dit maak dit makliker vir my om jonger karakters te vertolk,” vertel sy.
“Ek kan nie te veel weggee nie, maar ek dink hierdie karakter het my soms geskok en verbaas en ek dink sy gaan dieselfde met kykers doen.”
Talia hoop om in die toekoms meer ondervinding agter die kameras te kry, maar vir nou geniet sy haar gate uit voor die kameras en is sy baie opgewonde oor haar nuwe leading role.
Skemergrond is vanaf 1 Julie 2024 om 19:30 op kykNET&kie (DStv-kanaal 145) en DStv Stream. Dit sal ook ná uitsending op DStv Catch Up beskikbaar wees.
