Die kykNET-sepie Suidooster het Saterdag by die Stormsterk-konsert ’n paar geheime oor komende storielyne verklap. Dit was die vierde Stormsterk-konsert wat Suidooster by die jaarlikse Suidoosterfees in Kaapstad aangebied het. Dié konsert was ook die afskop van die sepie se tiende verjaardagvieringe.
Suidooster se hele permanente rolverdeling was deel van die uitverkoopte konsert, maar dit is deur ’n ensemblegroep bestaande uit Dean Smith (Wade), Natasha van der Merwe (Susan), Eden Classens (Justin), Jill Levenberg (Mymoena), Irvine van der Merwe (Nazeem), Simone Biscombe (Bianca), Craig Adriaanse (Gary), Jawaahier Petersen (Kaashifa) en Richard September (Bennie) gelei.
By die konsert is daar na drie toekomstige storielyne verwys:
1Bianca gaan (uiteindelik) ware liefde vind
’n Hoogtepunt van die konsert was toe daar op Bianca (Simone Biscombe) se liefdeslewe gefokus is. Sy het oor die afgelope tien jaar in Suidooster al tien liefdesteleurstellings gehad. Tog blyk dit dat daar lig aan die einde van die tonnel vir haar is! Riaan (Daniel Coetzee), Siya (Gantane Kusch) en Aiden (Theodore Jantjies) het op die verhoog, waar Bianca in ’n trourok gestaan het, verskyn en gesê dat sy in die nabye toekoms met een van hulle die knoop gaan deurhaak.
2Herenig Kaashifa en Rhafiek?
’n Verrassing by die konsert was Jawaahier Petersen se solovertoning van “You are my sunshine”. Dit het gefokus het op Kaashifa se moederskapsreis. Daar is duidelik gemaak dat Kaashifa binnekort na die sepie terugkeer. En boonop is daar gesinspeel dat sy dalk met haar vervreemde man, Rhafiek (Irshaad Ally), en babaseuntjie herenig kan word.
3Justin en Frankie is vir mekaar bestem
Nóg ’n nuwe liefde op Ruiterbosch se horison is dié van Justin (Eden Classens) en Frankie (Mienke Ehlers). Tydens die konsert, in ’n gespottery oor Justin se liefdeslewe, het Frankie op die verhoog gestrompel en is daar gesinspeel dat dié aantreklike blondine vir Justin se sjarme gaan val. Gaan hulle ’n paartjie word?
Suidooster word weeksdae om 18:00 op kykNET, DSTv-kanaal 144, en om 18:30 op kykNET & Kie, DSTv-kanaal 145, uitgesaai. Dit is ook beskikbaar op DStv Stream en Showmax.
