’n Roerende storie oor ’n gebroke familie (Barakat); ’n senutergende, grieselrige moordadige vertelling wat by ’n fopdosserklub afspeel (Stiekyt); en tasbare vrees in Suid-Afrika se eerste eko-riller (Gaia) was vanjaar se groot Silwerskermfees-wenners.
Barakat het wel nié die Oscars-kortlys gehaal soos gehoop nie, maar dié verhaal is ses keer oor by die fees bekroon, waaronder vir beste draaiboek en beste aktrise (Vinette Ebrahim).
Stiekyt het drie pryse gewen, insluitend vir Paul du Toit se uitnemende spel en Eduan Kitching se bedruk-intiem kinematografie wat dié veelvlakkige en kinkelryke storie tot sy amperse hipnotiese reg laat kom.
Gaia, wat reeds sy internasionale première by verlede jaar se SXSW-fees in Austin, Texas, gehad het, het vyf toekennings ingepalm, waaronder vir beste rolprent. Dié fliek, geskryf deur Tertius Kapp en met regie deur Jaco Bouwer (’n briljante span), is vir internasionale verspreiding geoormerk, waaronder in Europa.
Onder die kortfilms is Carla Smith en Marlo Minnaar as beste akteurs aangewys – Smith vir Skyn en Minnaar vir Aan/Af.
Die prys vir beste kortfilm is aan Leemtes en Leegheid, met die altyd-briljante akteurspaar Lida Botha en Johan Botha in die hoofrolle, toegeken.
Hier volg die volledige lys van Silwerskermfees-wenners:
Vollengte rolprente
Beste rolprent: Gaia
Beste regisseur: Jaco Bouwer (Gaia)
Beste akteur: Paul du Toit (Stiekyt)
Beste aktrise: Vinette Ebrahim (Barakat)
Beste draaiboek: Barakat
Beste manlike byspeler : Albert Pretorius (Stiekyt)
Beste vrouelike byspeler: June van Merch (Barakat)
Beste oorspronklike musiek: Kyle Shepherd (Barakat)
Beste kostuumontwerp: Ayesha Khatieb (Barakat)
Beste grimering en haarstilering: Sulani Saayman (Gaia)
Beste produksieontwerp: Sumaya Wicomb (Barakat)
Beste klankontwerp: Tim Pringle (Gaia)
Beste kinematografie: Eduan Kitching (Stiekyt)
Beste redigering: Leon Visser (Gaia)
Kortflieks
Beste kortfliek: Leemtes en Leegheid
Beste regisseur: DW Smith (Diana Mills Smith) (My beskermer)
Beste akteur: Marlo Minnaar (Aan/Af)
Beste aktrise: Carla Smith (Skyn)
Beste ensemble: Skyn
Beste oorspronklike musiek: Ryno Posthumus (Bennie Bingo)
Beste produksieontwerp: Baber
Beste redigering: Regardt Visser (Die Horries)
Beste draaiboek: Jordy Sank, Terence Makapan (Leemtes en leegheid)
Beste kinematografie: Justin Youens (Baber)
Beste bestaande werk: Ekstasis
Spesiale benoeming: My Beskermer
Draaiboeksoek-kompetisiewenners: Mariska Denysschen, Jan Lampen, AnnMaree Barry
Waar/wanneer kan jy die Silwerskermfees-flieks kyk?
Vollengte flieks
Barakat: Nou op DStv Online.
Beurtkrag: Beskikbaar op DStv BoxOffice vanaf 16 June 2022.
Gaia: Beperkte teatervrystelling vanaf 25 April. Ook beskikbaar op DStv BoxOffice vanaf 25 April.
Stiekyt: TBC
Indemnity: Na verwagting sal dit op 13 Mei by Ster Kinekor-fliekteaters première.
Down So Long: Binnekort op DStv BoxOffice.
Vlugtig: Binnekort op DStv BoxOffice.
Kortflieks
Die kortflieks is op DStv Online beskikbaar.
