Terwyl die nuutste – en derde – seisoen van Projek Dina op kykNET op DStv uitgesaai word, is die eerste twee seisoene van dié misdaaddrama op Showmax beskikbaar om te stroom.
Die eerste seisoen het oorhoofs om lasbriefbeampte Ronel Oosthuizen (Chanelle de Jager) se soektog na haar tweelingsuster, Dina, gedraai. Ronel het in die tweede seisoen vir Dina opgespoor, maar met die aanvang van die derde seisoen, is dit gou duidelik dat sy baie trauma het om te verwerk.
Die derde seisoen sien ook ’n reuse-verandering in die taakspan. Terwyl Ronel, Lux (Chumani Pan) en Charlie (Kay Smith) weer op hul pos is, is Deon (Tim Theron) gevra om met ’n buitelandse saak te help. Ene Zander (vertolk deur Laudo Liebenberg) word as die nuwe hoof van die taakspan aangestel, maar daar is gou wrywing tussen hom en die res van die span.
Nog nuwe gesigte dié seisoen sluit in Deon Coetzee, Arno Greeff, Cintaine Schutte, Frank Rautenbach en Corine du Toit.
Die derde seisoen se tien episodes draai elk om een of twee sake wat om vermiste persone draai. Elke saak wat die span ondersoek, is op werklike plaaslike sake gegrond.
Die reeks is gegrond op ware gebeure. Skepper Roberta Durrant se dogters is jare gelede amper ontvoer. Dis ’n senutergende drama, versadig en dik van emosie en trauma.
Weeklikse episodes vanaf 9 Mei 2023 om 20:00 op kykNET (DStv-kanaal 144 en DStv Online). Dié seisoen het Engelse onderskrifte en sal ook op DStv CatchUp beskikbaar wees. Kyk ook die eerste twee seisoene op Showmax.
