Kykers het vandeesweek kennis gemaak met ’n nuwe karakter in kykNET se telenovela, Diepe Waters. Bianca Bester het haar onverwagse verskyning as Fourie (David Louw) se eksvrou gemaak en haar teenwoordigheid gaan die poppe behoorlik laat dans.
Die rol van Bianca Bester word deur Natasja Jacobs vertolk. Kykers sal haar as Amanda in Getroud met Rugby onthou.
Oor haar karakter sê Natasja: “Bianca is ’n enigma. Niemand gaan haar kan vergeet nie, en die wêreld gaan nooit weer dieselfde wees nie. Goed of sleg, nadat Bianca deur jou lewe geloop het, weet jy sy was daar.”
Bianca is aantreklik, slim en suksesvol in haar eie juweliersbesigheid. Maar agter haar bekoorlike glimlag skuil ‘n verlede wat sy probeer begrawe het, vertel Natasja.
Hoewel haar seun, Juvan (Christiaan Ackerman), bly is om sy ma te sien, wek haar verskyning allermins vreugde by Fourie en haar voormalige skoonpa, Nelius (Jürgen Hellberg).
Fourie se hart is jare gelede gebreek toe Bianca vir hom en hul seun sonder enige verduideliking agtergelaat het. Nou is sy terug – maar wat bring Bianca werklik terug? Is dit bloot ’n geval van ’n ma wat haar verhouding met haar seun wil herstel, of skuil daar iets donkerder agter haar terugkeer? Soos dié storielyn uitspeel, blyk dit kykers gaan sien hoe moeilik dit is om ou geheime begrawe te hou…
“Bianca is nie daarop uit om enigiemand seer te maak nie. Kom ons sê maar net, daar is ’n paar mense wat lig moet loop. Sy mag dalk net weet waar hulle hul geraamtes begrawe het,” sê Jacobs oor die kinkels wat kykers kan verwag.
As sy haar karakter in een sin moet beskryf, sê Jacobs: “Bianca is daai dinamiese, komplekse, lewenslustige vrou wat jou beste vriend kan wees, maar daar is ’n donker kant wat jy definitief wil vermy.”
Kyk Diepe Waters Maandae tot Donderdae om 18:30 op kykNET (DStv-kanaal 144, ook aanlyn op DStv Stream). Dit is ook op Catch Up beskikbaar.
