(Hooffoto: Sulet Fourie Photography)
In ’n onderhoud met Landbouweekblad het die Boer soek ’n vrou-aanbieder Marciel Hopkins onthul dat dit haar laaste seisoen gaan wees waar sy boere help om liefde te vind. Marciel praat openhartig oor haar Boer soek ’n vrou-reis in die 11-18 Julie-uitgawe van Landbouweekblad. (Sy’s ook die voorbladnooi!)
Die mooi herinneringe en fantastiese lewenservaringe sal ek altyd saam met my neem en koester.
Marciel Hopkins
Marciel is sedert 2020 die aanbieder van Boer soek ’n vrou. Sy sê dat dit vir haar ’n “enorme voorreg” was om vir vier seisoene dié rol te kon vervul. Die sestiende seisoen van die maatsoekreeks begin op Donderdag 18 Julie.
“Om ’n pad met 40 boere te kon stap, het my lewe verryk, my opnuut in die liefde laat glo en ek is trotser as ooit om ‘n Suid-Afrikaner te wees,” sê sy.
“Die mooi herinneringe en fantastiese lewenservaringe sal ek altyd saam met my neem en koester.”
kykNET sal Marciel se opvolger ná afloop van vanjaar se seisoen aankondig.
Buiten Marciel, is Boer soek ’n vrou al deur Elma Postma (2008-2010), Angelique Gerber (2011-2013), Nadia Beukes (2014-2015), Minki van der Westhuizen (2016-2017) en Leah van Niekerk (2018-2019) aangebied.
Boer soek ’n vrou begin op Donderdag 18 Julie om 20:00 op kykNET (kanaal 144 op DStv en DStv Stream). Dit sal ook ná uitsending op Catch Up beskikbaar wees.
