Plaashuis is gegrond op die ware verhaal van twee vroue wat na ’n moordtoneel – ’n plaasmoord – uitgeroep word om dit skoon te maak. Dié rolle word deur Martelize Kolver en Nicole Holm – albei bekroonde aktrises – vertolk. Ook in die rolverdeling is Nêrens, Noord-Kaap en Pulse se Albert Pretorius.
Die fliek is onlangs op YouTube beskikbaar gestel om te stroom – gratis. Dít nadat dit eers by ’n rits internasionale rolprentfeeste gedraai het, waaronder die Tampere-rolprentfees in Ierland (2022), Aesthetica-kortprentfees in York, Engeland (2021) en die Regensburg-kortprentweek in Duitsland (2022).
Plaashuis, met regie deur die rolprentmaker Dian Weys, het egter met moeite die lig gesien. Weys, wat onder meer ook die Silwerskermfees-korte Versnel in 2017 geregisseer het, het hom uiteindelik na skarebefondsing gewend om Plaashuis te skiet.
Weys het vroeër in ’n onderhoud met Litnet gesê die idee vir die fliek het gekom nadat hy gelees het oor mense wat hul bure se huis ná ’n plaasaanval gaan skoonmaak het.
“Die idee dat mense bereid was om só iets vir hul naaste te doen was vir my ontsettend aangrypend. Ek het met die skoonmakers gaan gesels en die kortfilmdraaiboek het uit daardie gesprekke ontwikkel,” het hy vertel.
Weys se kortprent, Bergie, was ook een van die deelnemers aan vanjaar se Silwerskermfees.
Kyk ook dié kortflieks deur Weys op Showmax:
