Verlede jaar het Deon Meyer se topverkoperboek Devil’s Peak sy weg na die kleinkassie gevind en later vandeesmaand maak kykNET se Plan B, wat op van Meyer se vroeë karakters gegrond is, asook Netflix se fliekweergawe van Heart of the Hunter sy debuut.
Uit die lokprent, ons eerste kykie na dié fliek met die span van Scene 23 as vervaardigers aan die stuur, dui als daarop dat dié ’n adrenalienbelaaide vertelling is wat Meyer se boek gestand doen.
Die storie volg ene Zuko Khumalo (Bonko Khoza), ’n familieman wat eintlik ’n hele paar geraamtes in die kas wegsteek. Maar nes hy dink hy kan ’n rustige lewe met sy gesin lei, kom klop die verlede aan sy deur en dié voormalige sluipmoordenaar moet een laaste missie onderneem. Maar dis nie net sy familie se veiligheid op die spel as hy nie in sy taak slaag nie – ook Suid-Afrika se demokrasie kan finaal in duie stort… Die bad guys gaan egter gou wens hulle het nie Zuko se dodelikheid onderskat nie.
Onder die rolverdeling tel skermlegendes soos Connie Ferguson, Milan Murray, Deon Coetzee en Masasa Mbangeni. Ook met Tim Theron, Sisanda Henna, Peter Butler en Connie Chiume. Die regie is deur Mandla Dube met Meyer wat as uitvoerende vervaardiger leiding gee. Meyer het ook die draaiboek, tesame met Willem Grobler, geskryf.
Heart of the Hunter is vanaf 29 Maart 2024 op Netflix beskikbaar om te stroom.
Kry Netflix met DStv
DStv-intekenare kan met die nuwe Explora Ultra toegang tot Netflix kry. Kry dit nou →
