Van luidkeels lag en dans, tot trauma en trane wat oor die verloop van ’n enkele jaar in die lewe van ’n gesin uitspeel. Dís deel van die premis van die nuwe kykNET-gesinsdrama, Een keer om die son.
Daarin word die lewe van een familie oor die loop van ’n kalenderjaar uitgebeeld – een episode vir elke maand. Ivan Botha is die regisseur.
In die amptelike lokprent wat deur kykNET bekendgestel is, speel daar ’n tuimeltreinrit van emosies af soos ’n gesin wat op die oog af gelukkig lyk deur ’n tragedie getref word. Alles verander oornag soos tergende vrae spook.
kykNET het ook die uitsaaidatum bekendgemaak. Weeklikse episodes vanaf Dinsdag, 25 Junie 2024, wat ook op DStv Stream en Catch Up beskikbaar sal wees.
Onder die storie se uiteenlopende karakters is daar onder andere Ruan van Wyk (Jacques Bessenger), ’n neurochirurg. Hy is met Lani van Wyk (Jana Kruger) getroud. Hulle het saam drie kinders: Markus (Liam Bosman), wat in matriek is, die 15-jarige Leandri (Alma van Heerden), en Sophia (Klara van Zyl) wat 8-jaar oud is. Dan is daar ook Amé Cloete, vertolk deur Donnalee Roberts, Ruan se suster en ’n suksesvolle finansiële bestuurder. Sy is getroud met Joshua Cloete (Ludwig Binge), die eienaar van ’n kunsgalery. Ruan en Amé se ouers is Sebastian (Albert Maritz), ’n insekkunde-professor, en Elma (Joanie Combrink) besit ’n tuisnywerheid.
Ivan en Donnalee is ook, tesame met Danie Bester, vervaardigers van die reeks. Dis hul eerste TV-reeks wat hulle onder die vaandel van 17 Films geskep het. Die hoofskrywers is ook Ivan en Donnalee, met Liani Jansen van Rensburg, Retief Scholtz en Tina Kruger as medeskrywers.
Ook in die nogal volgepropte rolverdeling tel Pierre van Pletzen, Susanne Beyers, Alex van Dyk, Simone Neethling, Lee-Ann van Rooi, Adriaan Havenga, Bennie Fourie, Antoinette Louw en Amalia Uys.
Kyk Een keer om die son vanaf Dinsdag, 25 Junie, op kykNET en DStv Stream (DStv-kanaal 144). Ook ná uitsending op Catch Up beskikbaar.
