In kykNET se nuwe leefstyl-realiteitsreeks, Klein paradys, is daar vir ses spanne R1 miljoen op die spel en die kompetisie het nou in alle erns begin.
Hierdie ses eenhede moet oor die loop van slegs 25 dae in vyfster-gasteverblyf omskep word. Elke duo het ’n begroting van ’n halfmiljoen rand opgemaak uit gereedskap en produkte, asook kontant, om die werk gedoen te kry. Meeste van die arbeid sal egter deur die spanne self verrig word.
Die ses spanne het dit uitgespook in ’n kompetisie om gereedskap te gaan haal en teen ’n bord vas te sit. Daarna kon die spanne – in die wenvolgorde – kies watter eenheid hulle wil hê.
Elkeen van die eenhede is basies nog net ’n dop, maar die ontwerp van die dop en waar dit op die perseel is, is beslis belangrik.
Die spanne, hulle wenposisie en die eenhede wat hulle gekies het, is as volg:
Juan-Louis en Elri
Eenheid 5
Rede vir hulle keuse: Vir die estetika en privaatheid
Naam: Intak
Betekenis agter die naam: Ongerep
Mika en Jannie
Eenheid 3
Rede vir hulle keuse: Eenvoud, soos hul persoonlike styl
Naam: 22
Betekenis agter die naam: Hul gunstelinggetal
Lee-Ann en Johan
Eenheid 4
Rede vir hulle keuse: Baie vensters wat lig inlaat
Naam: Asem
Betekenis agter die naam: Wegbreek van die besige lewe
Maggie en Gerrie
Eenheid 2
Rede vir hulle keuse: Die uitsig
Naam: Palimpses
Betekenis agter die naam: Om iets nuuts uit iets ouds te maak
Klaas en Yvett
Eenheid 1
Rede vir hulle keuse: Die lelike eendjie wat ’n swaan kan word
Naam: Aardvark
Betekenis agter die naam: Om die natuur van buite na binne te bring
Alicia en Claudia
Eenheid 6
Rede vir hulle keuse: Kon nie anders nie, maar 6 is soortgelyk aan eenheid 3, wat hulle eerste keuse was
Naam: Kaapse Nooi
Betekenis agter die naam: ’n Woordspeling op ’n Kaapse uitnodiging
Eerste opdrag
Elke span moes teen die volgende oggend ’n vloerplan hê wat die volgende areas insluit: ’n leefarea, ’n badkamer, ’n kombuis, ’n slaapkamer, asook ’n buite-area van 30 m².
Dis nog aan die begin van die kompetisie, en Jannie en Mika het gaan help toe Alicia en Claudia gesukkel het om hul tent op te slaan, maar gaan die spanne altyd so behulpsaam wees?
Wat is volgende?
Die eerste episode het sonder enige groot drama verloop. Almal is nog vol ywer, vriendelik en sit die beste voetjie voor. Soos dit egter met realiteitsreekse is, weet ons dat dit nie altyd só gaan wees nie. Wanneer gaan die skroewe begin loskom?
Klein Paradys is op Donderdae om 20:00 op kykNET (DStv-kanaal 144) en is ook op DStv Stream en Catch Up beskikbaar.
