Showmax het pas die lokprent vir Khaki Fever, wat Vrydag 22 Augustus 2025 by die kykNET Silwerskermfees première, vrygestel. Dié gewaagde komedie is vanaf Vrydag 5 September 2025, op Showmax beskikbaar.
Khaki Fever draai om ’n private oord se groep wildbewaarders wat mekaar uitdaag om te sien wie met die meeste toeriste oor die loop van die toerisme-seisoen seks kan hê. Die prys? Die gesogte “Khaki-koning”-titel, asook al die verloorders se fooitjies… Maar hulle moet ook vir Anel (Trix Vivier), die konserwatiewe oordbestuurder, in die donker hou want as sy snuf in die neus kry, kan sy hulle summier afdank.
‘Watse koors?’
“Khaki-koors is wat gebeur wanneer eensame toeriste sien hoe gespierde wildbewaarders in hul khaki-kortbroeke uit hul 4×4’s klim,” sê die regisseur Brett Michael Innes. “As jy al ooit by ’n bosveld-wildoord was, het jy dít al gesien. So hierdie is ’n storie oor wilde diere en wilder veldwagters.”
Khaki Fever is ook Brett se tweede komedie as regisseur – dit volg op die sukses van Daryn’s Gym, wat in 2022 by die internasionale rolprentfees in Rotterdam meegeding het.
“Hierdie is ’n Vrydagaand-film, ’n snaakse en sexy safari-ontsnapping saam met jou vriende ná ’n lang week,” vertel Brett.
Brett het Khaki Fever saam met sy man, Nick Ahlers, geskryf. “Hulle sê jy moenie met diere of jou lewensmaat werk nie, maar ons het albei hierdie dinge gedoen en is steeds gelukkig getroud,” sê Nick.
Die rolverdeling
Die Emmy-bekroonde rolverdelingsregisseur Christa Schamberger het Brett en Nick gehelp om die veldwagters te kies.
Die Safta-benoemde Top Billing-aanbieder Christopher Jaftha staan aan die hoof van die rolverdeling as Daniel. Hy speel teenoor vier akteurs wat vir die vanjaar se Silwerskermtoekennings vir Film en TV benoem is: Anja Taljaard en Trix Vivier (albei Juffrou X), Liam Bosman (Een Keer Om Die Son), en Ilse Klink (Nêrens, Noord-Kaap). Ook die sanger Abel Knobel, Francois Jacobs (óftewel Kaalgat Karel) en Sean Brebnor (Getroud Met Rugby) verskyn as veldwagters – almal geklee deur Boerboel Wear, die welbekende handelsmerk wat al die khaki-uniforms in die film geborg het.
Juanita de Villiers (Reënboogrant) en Izette Blignaut (Binnelanders), asook ’n klompie leeus, kameelperde, hiënas, en ’n ratse Franse bulhond genaamd Chardonnay, maak ook deel van die rolverdeling uit.
Die Safta-benoemde Loki Rothman (Koek) het die musiek gekomponeer. Hy het ook ’n oorspronklike temalied vir die film geskep, gepas getiteld “Khaki Fever”.
Stroom Khaki Fever op Showmax vanaf Vrydag 5 September.
