By Victory Heights Sekondêre Skool is die eindeksamen net één van die uitdagings wat kinders in die gesig staar. Wanneer ’n nuwe, dodelike dwelm die plattelandse dorp tref, word dit ’n saak van lewe en dood. Juffrou X, die wiskunde-onderwyseres, bevind haarself in die middel van ’n oorlog, met die skool as prys. Al dieper begeef sy haarself in die wêreld en rol van ’n vigilante, totdat sy sélf moet veg vir haar lewe. Wie kan vertrou word? En wie gaan uiteindelik oorwin?
Dís die premis van kykNET se gritty nuwe dramareeks, Juffrou X, wat vanaf Dinsdag, 30 April 2024 op dié kanaal uitgesaai word.
Trix Vivier vertolk die naamrol.
Die reeks se draaiboek en regie is deur die Hertzogpryswenner Tertius Kapp en wys ’n outentieke kant van die onderwys wat in min Suid-Afrikaanse stories gesien word. Dít sluit die realiteite van armoede, bendes, misdaad en dwelms in, asook hoe dit skoolkinders se toekoms in gedrang kan bring.
Buiten Trix as Juffrou X, óftewel Inge Bester, sluit die rolverdeling bekende gesigte, onder andere Bianca Flanders, De Klerk Oelofse, Clayton Evertson, Brendan Daniels, Wilhelm van der Walt en André Jacobs, in.
Juffrou X word vanaf Dinsdag, 30 April 2024, om 20:00 op kykNET (DStv-kanaal 144) en DStv Stream uitgesaai. Dit sal ook ná uitsending op Catch Up beskikbaar wees.
