Gaslit is ’n kombinasie van politieke drama en satire. Die reeks is gegrond op die eerste seisoen van Leon Neyfakh se podcast, Slow Burn. Dit fokus op dele van die Watergate-skandaal wat nog redelik onbekend is. Dit sluit onder meer die rol in wat sekere fluitjieblasers gespeel het om president Richard Nixon vir sy misdrywe te laat boet.
Die spil draai hoofsaaklik om Roberts se karakter, Martha Mitchell. Mitchell was, ten spyte van haar man se posisie as prokureur-generaal in die Withuis, een van die eerste mense wat hardop Nixon se betrokkenheid by Watergate uitgewys het. Dié besluit het nie net politieke gevolge gehad nie – haar persoonlike lewe het ook ontrafel.
Gaslit het ’n punt van 89% op Rotten Tomatoes met die Financial Times wat Roberts se spel as “magneties” bestempel. The Age se resensie lui: “Gaslit mag dalk na Watergate met ’n nuwe lens kyk, maar die lesse is steeds geweldig relevant.”
Vanaf Maandag, 22 Mei 2023, op Showmax beskikbaar om te stroom.
