Die nuwe kykNET-dramareeks, Een keer om die son, volg die lief en leed van een familie oor die loop van ’n kalenderjaar. Elk van die twaalf episodes beeld ’n maand in hulle lewe uit. Daar is ook terugflitse om te wys hoe hulle beland het waar hulle is.
Een keer om die son is Ivan Botha en Donnalee Roberts, bekend vir trefferflieks soos Pad na jou hart, Stroomop en Blindelings, se eerste TV-reeks. Dit is onder die vaandel van 17 Films vervaardig met Ivan as regisseur. Ivan en Donnalee is medeskrywers van die reeks saam met Liani Jansen van Rensburg, Retief Scholtz en Tina Kruger. Donnalee is ook as Amé Cloete in die reeks te sien.
kykNET het pas die eerste teaser-video uitgereik.
Die reeks, wat in en om Kaapstad verfilm is, vertel die verhaal van ’n gesin wat op die oog af gelukkig lyk. Ruan van Wyk is ’n neurochirurg en is getroud met Lani van Wyk. Hulle is die ouers van drie kinders: Markus, wat in matriek is, die 15-jarige Leandri, en Sophia in graad 1.
Amé Cloete (Donnalee Roberts) is Ruan se suster en ’n suksesvolle finansiële bestuurder. Sy is getroud met Joshua Cloete, die eienaar van ’n kunsgalery. Ruan en Amé se ouers is Sebastian, ’n professor in insekkunde, en Elma, wat haarself besig hou deur vir ander mense te bak.
Maar dan tref ’n tragedie die familie wat tergende vrae opwerp, en alles verander oornag.
Die volledige rolverdeling vol bekende akteurs word volgende week saam met die amptelike uitsaaidatum bekendgemaak.
