Die tweede seisoen van Die brug het sommer van meet af aan met hope drama afgeskop. Daar was die chaotiese Houthuis wat deelnemers verwelkom het en die eerste fakkel wat reeds op Dag 1 afgevuur is.
Daai fakkel was die koms van hul eerste pos – ’n brief om leierskap te kies en dan ’n brief vir die nuutverkose leierskap. Die kies van ’n leier het ook met ’n kinkel gekom – die een wat die meeste stemme gekry het, moet die leierskap deel met die een wat die minste stemme gekry het.
Melissa Klein (37), ’n begrotingsbestuurder in die Departement van Verdediging (Pretoria) het die meeste stemme gekry. Hannes Roodt (33), ’n entrepreneur van Benoni en Luwellen Marx (53), ’n boubestuurder van Mosselbaai, het saam die minste stemme gekry. Melissa het vir Hannes as medeleier gekies.
Trekpas-tyd
Niemand was egter voorbereid op die inhoud van die tweede brief nie. Iemand moes huis toe gaan. Sonder enige genade en sommer dadelik. Die skok was tasbaar.
Tydens die vooraf-geselsies waar die deelnemers probeer het om mekaar beter te leer ken, het veral een deelnemer haar kaarte na aan die bors gehou. En vir Hannes, die selferkende ekstrovert, was dit nie ’n goeie ding nie . . .
Melissa en Hannes het besluit die valbyl val op Wilhrisca Brits (30), ’n internasionale model en besigheidseienaar van Polokwane. Sy sê toe die twee leiers instap, het sy geweet haar doppie is geklink.
Is die verkeerde brug gebrand…?
Maar wag ’n bietjie… Het hulle nie dalk ’n enorme flater begaan nie? Wilhrisca is nie ’n katjie wat jy sonder handskoene aanpak nie. Sy het verskeie talente – en dis so ver verwyderd van die loopplank as wat jy jouself kan indink!
Kykers sal verstom wees om te weet dat Wilhrisca nie net ’n mooi gesiggie is nie. Sy het ’n tegniese agtergrond en weet presies hoe ’n motor werk en aanmekaargesit is. Sy is gek oor motors en skep inhoud vir haar eie YouTube-kanaal (Drive Diva SA).
Dit klink mos of haar praktiese kennis van groot nut sou wees – dis immers een van die belangrike eienskappe om, ja wel, ’n brug te bou . . .
“Die brug is gebrand. Dit is wat dit is,” het sy gesê toe sy van die Houthuis vertrek het.
Wie sou Wilhrisca uitgestem het?
Maar wie sou in haar visier gewees het as die leierskapskoen aan die ander voet was?
“As ek moes kies, sou ek vir Hannes gestem het. In daardie stadium het ek net nie gevoel dat ek hom ten volle kon vertrou nie. Hy het soveel vrae gevra, en dit het net ’n bietjie té vriendelik voorgekom – amper asof hy meer inligting wou kry as om net te gesels.
“In só ’n situasie moet jy jou instinkte volg, en myne het vir my gesê om versigtig te wees,” sê sy.
Gaan dié verbrande brug met Wilhrisca perdalks die deelnemers vorentoe in die hakskeen byt?
- Die brug word Donderdagaande om 20:00 op kykNET (DStv-kanaal 144 en DStv Stream) uitgesaai. Episodes sal ná uitsending ook op Catch Up beskikbaar wees.
- Kyk ook solank die eerste seisoen op Showmax.
