Tien deelnemers van die koswerklikheidsreeks Kokkedoor Vuur & Vlam deel hul braaigeheime vir Braaidag wat op Sondag, 24 September op Erfenisdag gevier word.
1
Ashley Dokter (34), Mosselbaai
As jy langs my vuur kom staan, ongeag wat op die kole aangaan . . . Wees net die beste mens wat jy kan wees. Wees ’n trotse Suid-Afrikaner en geniet dit net.
2
Borries Bornman (46), Alberton
Vergeet van tyd – soveel minute op dié kant en soveel minute op daai kant op die vuur – dit maak geen sin nie want geen vuur is dieselfde hitte 15 minute uitmekaar nie. Moenie uit vuur hardloop nie. Kyk na die vleis se kleur. Voel jou vleis.
3
Cindy Menigo (38), Wellington
Beheer heeltyd jou vuur en kole. Sy is soos ’n vrou . . . as jy haar té kwaai stook, gaan jy brand en as jy haar afskeep, kry jy vaal kos! Braai waarvan jy hou, jy hoef niemand te beïndruk nie. As jy met liefde braai sal dit heerlik wees. Proe alles voordat jy dit voorsit.
4
Gert Joubert (31), Jeffreysbaai
As jy dit geniet, dan doen jy iets reg.
5
Kevin Reed (24), Brackenfell
Hou jou hitte dop.
6
Bertus Fourie (49), Wellington
Die witwyn moet koud wees. Op ’n ernstige noot, as ek moet . . . raak stil, en dissekteer die vuur in sy dele: Vlamme, rook, as, kole – en jy sal gou besef dat jy soveel meer kan doen as net ’n tjoppie gaar kry. Vlamme seël en kole rooster terwyl as stowe en rook geur verskaf.
7
Joubert Spies (38), Pretoria
As jy dink jy het genoeg vuur om te braai, gooi nog hout op!
8
Karen Els (46), Malmesbury
Dis basies twee wenke wat saamloop wat ek altyd probeer toepas. Moet nooit jou vleis aanhoudend omdraai nie. Nadat jy dit op jou warm rooster geplaas het, draai jy dit net een keer om. En ek hou altyd ’n spuitbottel met gegeurde soutwater/olyfolie byderhand om die vleis gereeld te spuit. Dis dieselfde tegniek waarop bedruiping vir ’n spit werk.
9
Nate Smith (48), Durbanville
Moenie bang wees vir kole wat té warm is nie. Dit werk beter vir karamelisering en ook om die sous binne te hou. Jy kan dit dan na kole met ’n laer temperatuur beweeg en gaarheid bepaal. Dis nie so maklik as jy met kole begin het wat te koud was nie.
10
Nicole Buirman (35), Robertson
Moenie die vleis dóódbraai nie.
Kokkedoor Vuur & Vlam saai Donderdagaande uit om 20:00 op kykNET (DStv-kanaal 144 en DStv Stream). Die reeks is ook op Catch Up beskikbaar. Ons geliewe resensent, Annie Brand, se recaps word direk ná elke nuwe episode omstreeks 21:00 gepubliseer.
