Die lys van plaaslike ware-misdaad dokumentêre raak net al langer. Van Boetie Boer en Devildorp tot Rosemary’s Hitlist en The ABC Killer, en nou ook die nuwe Netflix-reeks, Beauty and the Bester. Dié reeks volg ná Showmax se Tracking Thabo Bester-dokumentêr wat verlede jaar vrygestel is, met dr. Nandipha Magudumana, eerder as Thabo Bester, wat sentraal tot die storie staan.
Die drieledige dokkiereeks is nou op Netflix beskikbaar. Dit probeer hoofsaaklik ontsyfer hoe dié eens glansryke en suksesvolle dokter by Bester, ’n veroordeelde moordenaar en reeksverkragter, betrokke geraak het.
Haar lewe het immers soos ’n suksesverhaal gelyk. ’n Blink loopbaan, luukse leefstyl en ’n beeld wat sy sorgvuldig aanlyn gekweek het. Maar alles het begin verbrokkel toe vrae oor haar rol in Bester se dramatiese ontsnapping uit die tronk ontstaan het. Een foto van die paartjie wat doodluiters by Sandton City inkopies doen, het vinnig versprei en ’n landwye soektog aan die gang gesit wat uiteindelik tot die paartjie se inhegtenisneming in Tanzanië gelei het.
Die reeks ondersoek egter nie net die dramatiese gebeure wat haar agter tralies laat beland het nie. Dit neem ook haar lewensverhaal in die breë in oënskou soos familie en vriende in onderhoude hart skoonmaak.
Intussen duur haar hofsaak – waarin sy saam met Bester en ’n klompie ander medebeskuldiges tereg staan weens een van Suid-Afrika se berugste tronkontsnappings – voort.
Beauty and the Bester is vanaf 12 September 2025 op Netflix beskikbaar om te stroom. Kyk ook Tracking Thabo Bester op Showmax.
Lees ook
Kry Netflix met DStv
DStv-intekenare kan met die nuwe Explora Ultra toegang tot Netflix kry. Kry dit nou →
