B Positive draai om Drew (Thomas Middleditch van die slim Silicon Valley), ’n terapeut en geskeide pa, wat dringend ’n nierskenker benodig. Dan, heel tydig, duik ’n vrou uit sy verlede skielik op (Annaleigh Ashford), en sy bied aan om haar nier aan hom te skenk.
Dit verander natuurlik albei se lewens handomkeer en ’n onwaarskynlike vriendskap ontluik.
B Positive is vir twee 2021 Emmy’s benoem en het ’n punt van 85% op die resensiewebwerf Rotten Tomatoes.
Veral Ashford is vir haar spel uitgesonder met Variety se Caroline Framke wat skryf: “In Ashford se hande kry selfs Gina se eenvoudigste lyne ’n slim aflewering, en sy laat net genoeg opregte kwesbaarheid deursyfer om só, by verre, die storie se bekoorlikste karakter te word.”
B Positive is uit die stal van Chuck Lorre – een van die bekendste en suksesvolste sitkom-skeppers, insluitend Mom, The Big Bang Theory en Two and a Half Men.
