If you can dream it, it can happen! Ons sepieskrywers het kykers al oor die jare bederf met ikoniese paartjies soos Hilda en Oubaas in 7de Laan, Nick en Sanet in Egoli, Wendy en Steve in Arendsvlei, en Lienkie en Blitz in Getroud met Rugby.
Maak nie saak of jy ’n paartjie love of haat nie, jy kan daarop bargain dat hulle jou minstens gaan vermaak. As kykers het ons al gelag, geskree, gebid en gehuil vir én met ons gunsteling – en mees irriterende – paartjies op die kassie.
Met Valentynsdag om die draai het terloops ’n lysie opgestel van agt sepie-paartjies wat ons tans voor die kassie vasgenael hou.
So, wie is jou gunsteling sepiepaartjie?
1
Hein en Birdie (Arendsvlei)
Toe Hein (Merlin Balie) en Yvette (Charlene le Roux) uitmekaar is, het ek nooit gedink Hein sou weer liefde vind nie. Om eerlik te wees – ek het gedink hy en Yvette sou weer mekaar vind. Toe kom Birdie (Hermien de Vos) soos ’n warrelwind ingestorm en daar steel sy binne weke Hein se hart. Hul liefde het so vinnig vlamgevat dat ek oortuig was dat dit nie lank sou hou nie, maar hulle het almal verkeerd bewys en is tans een van die mees stabiele verhoudings in Arendsvlei. Hul verhouding is net so interessant soos hulle, maar dié ouer paartjie wys ons elke week dat die liefde nie ouderdom ken nie.
2
Desmond en Rachel (Arendsvlei)
Daar is mense wat die beste en die slegste in iemand kan uitlok. Desmond (Alistair Izobell) en Rachel (Kim Syster) bring absoluut die boosheid in mekaar uit. Waar dié twee saam is, weet jy drama gaan volg. Ons het lanklaas vir Rachel op die kassie gesien, maar ons weet sy trek nog toutjies in die agtergrond. Sy het mos kamstig vir ’n tydjie verdwyn om haar en Desmond se love child in vrede in die wêreld te bring. As hierdie twee eers begin konkel, dan weet jy die poppe gaan dans. Hulle is nou nie my gunsteling-paartjie nie, maar hulle bring ál die aksie en drama. Ek wag in spanning vir Rachel om terug te keer.
Arendsvlei is elke Maandag tot Donderdag op kykNET & kie (DStv-kanaal 145, ook op DStv Stream) om 19:30 te sien. Dit is ook op Catch Up beskikbaar.
3
Tertius en Tracy (Binnelanders)
Hierdie twee besties het bewys dat vriendskap die beste fondasie vir ’n verhouding is. Tertius (Reynardt Hugo ) en Tracy (Melinda Viljoen) was vir jare net goeie vriende en het mekaar deur lief en leed bygestaan. Skielik ontwikkel hulle gevoelens vir mekaar, and the rest, as they say, is history. Okei, dit was nou nie so maklik nie en hulle deel steeds die geheim dat Conrad (Hykie Berg) eintlik hul baba se pa is… Maar al het hulle amper nie by mekaar uitgekom nie, is ons hier vir hierdie friends turned lovers-romanse.
4
Louis en Naomi (Binnelanders)
Hierdie twee was nog altyd couple goals, maar danksy Louis (Germandt Geldenhuys) se onlangse gesmokkel met organe weet ek nie of hul verhouding hierdie storm gaan oorleef nie. ’n Meer liefdevolle, ondersteunende en toegewyde paartjie kry jy nie sommer in sepieland nie. Verhoudings verander vinniger as seisoene in ons sepies, so hierdie twee se epiese verhouding is beslis een vir die boeke. Ag, ek hoop tog Naomi (Je-ani Swiegelaar) vergewe vir Louis… Hy wou immers net haar lewe red.
Binnelanders saai op weeksdae om 19:30 op kykNET (DStv-kanaal 144, ook op DStv Stream) uit. Episodes is ook ná uitsending op Catch Up beskikbaar.
5
Johan en Charity (Diepe Waters)
As Desmond en Rachel die slegste in mekaar uitbring, is hierdie twee die teenoorgestelde. Johan (Liam Bosman) was sterk op pad na ’n lewe van dwelms en seksuele teistering, terwyl Charity (Dané de Waal) ’n onbeskofte boemelaar was. Nie een van hulle was opsoek na ’n verhouding nie, maar vandat hulle saam is, floreer hulle albei. Hulle bring wraggies die heel beste binne en buite die swembad in mekaar uit. Ek kan nie wag om te sien wat hulle volgende gaan bereik nie.
6
Sanet en Dominee Ben (Diepe Waters)
Aanhouer wen! Sanet (Nadia Valvekens) was ’n magneet vir romantiese teleurstellings. Eers het haar man haar vir haar suster gelos en toe los haar skelmpie haar vir sy vrou. Dít is erger as om geen matches op Tinder te kry nie. En net toe sy wou opgee, lei die Here vir haar in Dominee Ben (Eric Bouwer) se arms in. Wie sou dan nou dink dat Sanet net ’n kerksuster moes word om liefde te vind? Die oomblik toe sy haar gekonkel met Gys (Justin Strydom) los, word sy gebless. Dit wys jou net, los daai sondes en skelmstreke!
Honorary mention: Zelda en Gys (Diepe Waters)
Hulle is nou wel nie ’n amptelike paartjie nie, maar hierdie twee is so lus vir mekaar dat hulle uit frustrasie mekaar se lewens probeer verwoes. Hulle deel ook ’n love child saam en wanneer hulle wel weer lyk asof hulle hul verhouding ’n kans wil gee, is dit die enigste tyd wat ons ’n sagte kant van hulle sien. Ongelukkig hou dit nooit langer as vyf minute nie. Maar dit is darem flippen entertaining.
Kyk Diepe Waters Maandae tot Donderdae om 18:30 op kykNET (DStv-kanaal 144, ook aanlyn op DStv Stream). Dit is ook op Catch Up beskikbaar.
7
Susan en Elana (Suidooster)
Susan (Natasha van der Merwe) het nou wel op haar vrou ge-cheat en met ’n jonger man weggehardloop, maar sy het haar fout besef en nou is hierdie powerhouse couple weer saam. Elana (Esther von Waltsleben) is die kalm en volwasse een, terwyl Susan altyd vir pret sorg. Saam is hulle soos vinkel en koljander, twee van die beste en lekkerste speserye in my kas.
8
Angie en Wade (Suidooster)
Ek het gedink Wade (Dean Smith) is mal om Angie (Char Carrie) terug te vat nadat sy hom die eerste keer met skuld en sonder familie gelos het. Maar Angie het aan ons almal bewys dat mense kan verander. En al was albei onlangs baie bly toe hulle besluit het om hul verlowing uit te stel, sien ek ’n romantiese toekoms vol kinders vir hierdie twee. ’n Snaakse en meer spontane paartjie kry ’n mens nie en ek het nog nooit so lekker vir ’n paartjie gelag soos vir hulle nie.
Kyk Suidooster weeksdae om 18:00 op DStv-kanaal 144 (ook aanlyn op DStv Stream) of ná uitsending op Catch Up.
