Wie’s wie in ‘Tali’s Joburg Diary’

Sy het dalk die pandemie oorleef, maar haar beursie? Uhm… Not so much. Trouens, in Tali’s Joburg Diary, sukkel Tali om haar spoggerige leefstyl te finansier. Sy aanvaar noodgedwonge ’n reddingsboei, maar dit beteken ook sy en die fam moet na die Goudstad terugtrek. Tali laat nie op haar wag nie – hierdie is immers ’n geleentheid om bewind as Queen Bee van Jozi oor te neem en vir Jayden by ’n fancy kleuterskool in te kry.

Tali’s Joburg Diary is vanaf 18 November op Showmax beskikbaar om te stroom. Nuwe episodes sal weekliks beskikbaar gestel word. 

Kyk ook die vorige twee Tali-reekse ook op Showmax:

• Tali’s Wedding Diary
• Tali’s Baby Diary

Hier is ’n oorsig van dié seisoen se hoofkarakters:

Julia Anastasopoulos as Tali

Julia het bekendheid verwerf as die skreeusnaakse doyenne van doen-dit-self, SuzelleDIY. Nadat sy miljoene YouTube-aanhangers opgetel het, het Julia, ook ’n bekende illustreerder en kunstenaar, haar nuwe skepping aan die wêreld bekendgestel: Einste Tali. Julia is getroud met medeskrywer en regisseur Ari Kruger. Die egpaar besit Sketchbook Studios, wat al drie seisoene van Tali vervaardig het.

Anton Taylor as Darren

Anton, gebore en getoë in Kaapstad, het ’n reeks snaakse YouTube-video’s gemaak voordat hy ’n as “Darrennnnn-ah” bekend in Tali bekend geword het. Behalwe dat hy ’n skreeusnaakse komedie-akteur is, is Anton ook ’n rugbykommentator vir SuperSport. Lees ook Watkykjy se onderhoud met hom.

Glen Biderman-Pam as Rael

Benewens sy werk as akteur, is Glen ook ’n bekende stand-up komediant. Sy satiriese YouTube-video, My Kreepy Teacher, wat die grap gevat het met die dokkie My Octopus Teacher, het kort ná vrystelling viral gegaan. In Tali speel hy Rael Rosen, ’n wannabe mover and shaker.

Kate Normington as Michelle

Kate is ’n veteraan van verhoog en skerm – plaaslik en internasionaal – met produksies vanaf Kaapstad tot London se West End. Sy is die wenner van verskeie Fleur du Cap- en Naledi-toekennings, en as Tali se ma, Michelle, kry sy die geleentheid om haar komedie-spiere te strek. 

Troy Davy as Jayden

Ontmoet Tali en Darren se kleuter, Jayden!

Sharon Spiegel Wagner as Monique the Beak

Ook nuut in die rolverdeling is Sharon Spiegel Wagner as Monique the Beak – ’n eina doring in Tali se vlees dié seisoen.

Kate Pinchuck as Taryn Wiener 

Kate het haar debuut in die Tali-wêreld in Tali’s Baby Diary as Darren se lomp niggie, Taryn, gemaak en keer terug vir die Johannesburg-shenanigans.

Ook in die rolverdeling:

• Coconut Kelz / Lesego Tlhabi as haarself
• Stephanie Anastasopoulos (Julia se suster) as Tali se suster, Mikaela
• Guy de Lancey as Tali se pa, die eiendomsmagnaat, Les Shapiro
• Lucienne Bestall as Ashley
• Ndoni Khanyile as die skoolhoof van Little Angels Hyde Park, Barbara Bhembe