Wat om te kyk op Netflix in Januarie ’22

Cheer S2

Dié Emmy-bekroonde trefferreeks se tweede seisoen begin met alles op die spel.

Terwyl Texas se Navarro College Cheer sy kampioenskapskroon midde verskeie uitdagings probeer verdedig van onder andere hul grootste teenstanders by Trinity Valley Community College, is daar ook ander jakkalsies wat die span se kameraadskap en vetroue in mekaar bedreig. 

Seisoen 2 draai deels om die buzz wat rondom Navarro Cheer ontstaan het ná die span se oorwinning by die NCA & NDA Collegiate National Championship in Daytona, Florida in 2019. Maar roem het sy eie prys, en dít kan die span uit Texas duur te staan kom…

Buiten die impak van die media-aandag op die span, is daar die Covid-19-pandemie wat die sportseisoen omvergooi en een van die spanmaats wat van seksuele misdrywe beskuldig word. Teen hierdie dramatiese agtergrond, brei die storie se fokus uit om oor die loop van die seisoen se nege episodes ook Navarro se felste mededinger, Trinity Valley Community College, onder die vergrootglas te plaas soos albei spanne hulle vir die 2021-kampioenskap beywer.

Soos met die Navarro-span, het TVCC ’n charismatiese afrigter en talentvolle sterre.

Vanaf 12 Januarie.

The Woman in the House Across the Street from the Girl in the Window

Vir die mistroostige Anna (Kristen Bell) is elke dag dieselfde. Sy sit met haar glas wyn, staar by die venster uit en kyk hoe die lewe sonder haar verbygaan. Maar as ’n aantreklike buurman (Tom Riley) en sy skattige dogter (Samsara Yett) oorkant die straat intrek, sien Anna lig aan die einde van haar eensame tonnel. Dit is totdat sy ’n grusame moord aanskou…Of het sy?

The Woman in the House Across the Street from the Girl in the Window is ’n donker, wyndeurdrenkte komedie met ’n satiriese inslag op die versadigde, en dikwels absurde, sielkundige riller-genre. Dit sal jou laat raai wie, wat, waar, hoekom en hoe in die hel?! tot die heel einde.

Michael Ealy, Mary Holland, Shelley Hennig, Cameron Britton, Christina Anthony en Benjamin Levy Aguilar maak ook deel van die rolverdeling uit.

Vanaf 28 Januarie.

Ozark S4: Part 1

Dié veelbekroonde reeks het ’n punt van 89% op die resensiewebwerf Rotten Tomatoes en draai om Jason Bateman se karakter, Marty Byrde, ’n finansiële adviseur wat sy gesin van Chicago na die Missouri Ozarks sleep.

Om ’n dwelmbaas te paai ná ’n geldwasseryskema wat lelik skeefloop, moet Marty binne vyf jaar $500 miljoen se dwelmgeld “skoon” kry.

Met sy vrou Wendy en hul twee kinders op sleeptou, en met hul lot wat in die weegskaal hang, dwing dié moeilike, stresvolle, en soms angswekkende omstandighede die gebroke gesin om die bande tussen hulle te herstel.

Die reeks ondersoek kapitalisme, gesinsdinamika en oorlewing deur die oë van (enigiets behalwe) gewone Amerikaners.

Seisoen 4 van Ozark word in twee dele vrygestel en bestaan uit sewe episodes elk.

Vanaf 21 Januarie.

After Life S3

Ricky Gervais keer terug vir die finale seisoen van een van Netflix se top-reekse, After Life. Ja, verwag trane en snot, en ja, dit sal jy wees wat so ween! 

After Life volg die lewe van ’n plaaslike koerantjoernalis, Tony (Gervais), ná die kanker-dood van sy geliefde vrou, Lisa (Kerry Godliman). Hy haal sy woede op almal rondom hom uit en sy vriende en familie moet hard op hul tande kners oor sy filterlose kommentaar en haglike gedrag, maar, omdat hulle vir hom jammer voel, laat hulle hom met die ongelooflikste goed wegkom. Slegs ’n weduwee, Anne (Penelope Wilton), wat hy by die plaaslike begraafplaas ontmoet, praat reguit – en uit die hart uit – met hom. 

Aan die einde van seisoen 2 het dit gelyk of die aard van Tony en Emma (Ashley Jensen), die verpleegster wat Tony se pa Ray (David Bradley) voor sy afsterwe versorg het, se verhouding dalk in ’n (soort van) romanse kan verander. In die derde seisoen sien ons juis hoe hul dinamiek ontwikkel soos hy nou ook sy pa se dood moet verwerk.

Vanaf 14 Januarie.

#AfterLife is officially the most watched British comedy of the decade with a viewership of nearly 100 million. Season 3 launches Jan 14. pic.twitter.com/ctL729lgEl

— After Life (@AfterLife_Fans) December 15, 2021

Ook nuut op Netflix:

1 Januarie 

• The Hook Up Plan S3  
• Chief Daddy 2: Going for Broke

4 Januarie 

• Action Pack 
• 4 metà 

5 Januarie 

• Rebelde  
• Four to Dinner  

6 Januarie 

• The Club: Part 2  
• The Wasteland  

7 Januarie 

• Hype House  
• Mother/Android  
• Johnny Test S2 

10 Januarie 

• Undercover S3  

12 Januarie 

• How I Fell in Love with a Gangster  

13 Januarie 

• The Journalist  
• Photocopier  
• Brazen

14 Januarie 

• The House  
• Archive 81  
• This Is Not a Comedy  
• Riverdance: The Animated Adventure  

15 Januarie

• Ophelia
• The Parts You Lose

18 Januarie 

• The Puppet Master: Hunting the Ultimate Conman  
• DOTA: Dragon’s Blood: Book 2  
• Mighty Express: Train Trouble  

19 Januarie 

• El marginal S4  
• Heavenly Bites: Mexico  
• Too Hot to Handle S3

20 Januarie 

• Midnight Asia: Eat · Dance · Dream  
• The Royal Treatment  

21 Januarie 

• Summer Heat  
• My Father’s Violin  
• Munich  The Edge of War  
• That Girl Lay Lay  
• Amandla

24 Januarie 

• Three Songs for Benazir  

25 Januarie 

• Ada Twist, Scientist S2 
• Snowpiercer S3 (Weekliks) 

27 Januarie 

• Chosen  
• Framed! A Sicilian Murder Mystery  

28 Januarie 

• Feria: The Darkest Light  
• In From the Cold  
• Getting Curious with Jonathan Van Ness  
• Angry Birds: Summer Madness  
• The Orbital Children 
• All of Us are Dead