Wat om te kyk op DStv in April 2023 – hier is ons top-keuses.
Let wel: datums, tye en vertonings kan verander. Hierdie skedule is slegs vir SA DStv-intekenare. Vir die volledige skedule en besonderhede oor reekstye en die betrokke kanale, kliek hier.
Angela Black S1
Angela Black is nie aldag maklike kykstof nie. Inteendeel: die temas van huishoudelike en geslaggebaseerde geweld word vroeg in dié sesdelige reeks se boublokke vasgelê. Downton Abbey se Joanne Froggatt vertolk einste Angela Black, ’n ma van twee wat nie uit die hel van haar huwelik met ’n gewelddadige man kan ontsnap nie. Maar dan word sy deur ’n man genader wat haar man se siekste geheime aan haar blootlê en haar wêreld word op sy kop gedraai.
Ook deel van die rolverdeling is The Flight Attendant se Michiel Huisman en Samuel Adewunmi.
Common Sense Media skryf oor dié reeks: “’n Hoë vlak van spanning en meedoënlose misleiding weef ’n gevoel van angs en benoudheid deur elke episode van hierdie raaiselreeks.”
Weeklikse episodes vanaf Donderdag, 26 April, om 22:00 op M-Net (DStv-kanaal 101) en DStv Online.
Die Real Housewives van die Wynlande
Die Real Housewives van die Wynlande is die splinternuwe Real Housewives-reeks wat volg op die eerste Afrikaanse weergawe van die franchise, Die Real Housewives van Pretoria. Onder die vroue is skoonheidskoninginne, ’n dokter én ’n doktor en genoeg glans vir ’n leeftyd.
Weeklikse episodes vanaf Donderdag, 20 April, om 20:00 op kykNET (DStv-kanaal 144) en DStv Online.
Lui maar op, Belinda S3
Daar wag vreugde, komedie én trane in die nuwe seisoen van Lui maar op, Belinda. Brümilda van Rensburg vertolk steeds die naamrol teenoor Annelisa Weiland (Annetjie) terwyl Duncan Johnson (Ian), Wian Taljaard (Dirkie) en Carmen Maarman (Maggie) steeds sorg vir heerlike vermaak. Eric Nobbs, wat die geliefde karakter Frans gespeel het, is oorlede tydens verfilming van die nuwe seisoen en is steeds in die eerste drie episodes te sien. Die rol van Frans word daarna deur die veteraan-akteur Chris van Niekerk vertolk.
Die reeks volg die wel en weë van ’n groepie aweregse karakters wat by ’n hardewarewinkel in George werk. Aan die einde van die vorige seisoen het Belinda ontdek sy het borskanker. Met die aanvang van die nuwe seisoen word dié storielyn hervat – ’n wipwarit van emosies wag op kykers soos dié reis van Belinda uitgebeeld word.
Weeklikse episodes vanaf Maandag, 3 April, om 20:00 op kykNET (DStv-kanaal 144) en DStv Online.
Without Sin S1
Die Line of Duty-aktrise, Vicky McClure, word deur die bank vir haar spel in die rillerreeks Without Sin geprys. Daarin vertolk McClure ’n ma wat in diepe rou gedompel is nadat haar tienerdogter vermoor word. As sy dan later die man wat agter tralies vir haar dogter se moord is, konfronteer, is sy geskok deur dit wat sy ontdek.
Volgens The Guardian het die reeks dieselfde tipe gravitas en trefkrag as Happy Valley. Dit ontvou as beide ’n sielkundige riller én ’n ontdekkingstog deur die nuanses van rou.
Weeklikse episodes vanaf Donderdag, 13 April, om 22:00 op M-Net (DStv-kanaal 101 en DStv Online).
Net Mens
Die dokumentêre kykNET-reeks Net Mens neem die lewensverhale van plaaslike bekendes onder die loep. In April is daar vier episodes waarin daar dieper in die mens agter die naam gedelf word. Op 9 April maak Binnelanders se Cindy Swanepoel haar hart oop; op 16 April is dit die sanger Refentse se beurt; op 23 April vertel die sepie-akteur Hykie Berg sy storie; en op 30 April is die gewilde kletsrymer Early B voor die kamera.
Weeklikse episodes vanaf Sondag, 9 April, om 20:00 op kykNET (DStv-kanaal 144) en DStv Online.
Op reis met my beste vriend S1
Neels van Jaarsveld se miniatuur-spikkelworshond, Lulu, is amper net so bekend soos hy. In hierdie nuwe reeks gaan Neels, Lulu en kykers vir ander bekendes en hul troeteldiere ontmoet. Saam gaan hulle alles doen – van hondevriendelike roomys tot met dieresieners praat.
Weeklikse episodes vanaf Saterdag, 8 April, om 18:00 op kykNET (DStv-kanaal 144) en DStv Online.
