Warrior, gegrond op die skrywes van die vegkunstenaar Bruce Lee, speel af in die genadelose wêreld van San Francisco in die laat 19de eeu, met mededingende Chinatown-groepe wat om oorheersing veg. In die nasleep van die vorige seisoen se ras-onluste, gebruik Mai Ling (Dianne Doan van Agents of S.H.I.E.L.D.) haar politieke netwerk om mag te konsolideer. Dít terwyl Ah Sahm (Andrew Koji, Bullet Train) en die Hop Wei-groep nuwe maniere moet vind om te oorleef.
Die reeks is in Kaapstad verfilm en daar is ook verskeie Suid-Afrikaners in die rolverdeling. Onder dié tel Colin Moss, Robert Hobbs en Andre Jacobs.
Warrior, wat deur Inverse as “die mees onderskatte aksiereeks van die eeu” beskou word, se tweede seisoen het ’n punt van 100% op die resensiewebwerf Rotten Tomatoes. Die eerste seisoen is ook as een van Rolling Stone se beste nuwe televisieprogramme van 2019 aangewys.
Die vorige seisoene is op Showmax beskikbaar. Weeklikse episodes van die derde seisoen is vanaf Vrydag, 30 Junie 2023, op Showmax beskikbaar om te stroom.
