“Dit is die beste kanker om te kry.” Dis die dokter se woorde aan ’n verwarde Kittie Classen (Carla Smith van Binnelanders) pas nadat sy met Hodgkin-limfoon gediagnoseer is. Maar Kittie, ’n 22-jarige student, het mos dan nou planne. Sy het dinge om te doen, doelwitte om te bereik, ’n loopbaan om op te bou! Maar nou moet sy om haar lewe veg.
Tydelik Terminaal is ’n hartverwarmende verhaal vol hoop. Dit is gegrond op die reeks se skepper, Elanie Rupping, se eie stryd teen kanker.
Dit word vervaardig deur Nouvanaand Films, wat ook komedie-goud soos Hotel en Buurtwag gemaak het.
Tydelik Terminaal se rolverdeling sluit in SAFTA-wenners Anna-Mart van der Merwe (Poppie Nongena) en Tiffany Barbuzano (Still Breathing) asook Zane Masel (Isidingo), Anel Alexander (Sink) en Frank Opperman (Dominee Tienie).
