Die hoofrol in Three Pines word deur die veteraanakteur Alfred Molina (Magnolia, Frida, The Da Vinci Code) vertolk. Molina het al weinig sy voet met toneelspel verkeerd gesit. Ook nie hier nie. Die reeks is gegrond op Louise Penny se boekreeks. Dit draai om die ondersoeke van die speurder, Armand Gamache, in Three Pines, ’n kleine ou dorpie in Quebec. Dié plek is toe nie so idillies soos dit voorkom nie… Daarvan getuig ’n rits moorde en verborge geheime wat aan die lig kom.
Die eerste reeks bestaan uit vier afsonderlike moordraaisels wat opgelos moet word met elkeen van die raaisels wat oor twee episodes strek. Anders as in die boeke, is daar egter ook ’n goue draad – of raaisel – wat regdeur die hele reeks strek met Gamache wat ook die verdwyning van ’n jong vrou probeer ontsyfer.
Vanaf Maandag, 22 Mei 2023, op Showmax beskikbaar om te stroom.
