Die Britse komedie-drama, This Is Going to Hurt, is gegrond op Adam Kay se gelyknamige memoir en is nou op Showmax beskikbaar. Die reeks volg sy werk as ’n dokter in ’n hospitaal se (chaotiese) verloskunde- en ginekologie-afdeling.
Daar’s dae waar slaap ’n mite is en pasiënte onverwags sterf. Ander dae knak persoonlike verhoudings en familiebande onder die druk van sy dokters-bestaan.
Dit is wel ’n fiktiewe vertelling, so van die uitbeeldings van sy alledaagse ervarings moet liefs met ’n knippie sout geneem word.
Die hoofrol word deur Ben Whishaw vertolk. Whishaw is bekend vir sy rolle in Fargo, en as Q in die James Bond-flieks Spectre en No Time to Die.
Dit klink ernstig – en dit is – maar verweef met ’n eiesoortige en egte humor wat jou intrek. Laughter is the best medicine, laat This is Going to Hurt blyk.
Die reeks het ’n punt van 93% op die resensiewebwerf Rotten Tomatoes.
