Die Britse polisiedrama The Bay keer met ’n derde seisoen terug.
In die tweede seisoen het ons gesien hoe Lisa Armstrong (Morven Christie) ná haar skorsing ’n paar range na speurkonstabel afgeskuif is. Sy is toe by die ondersoek na die moord op ’n prokureur betrek en haar eksman het boonop ook sy opwagting gemaak met sy onverwagte terugkeer na Morecambe.
Intussen het Christie (en haar karakter) die reeks verlaat. Met die aanvang van die derde seisoen ontmoet ons dus Marsha Thomason as speurder Jenn Townsend – ’n nuwe toevoeging tot die span. Sy word sommer reeds op dag een in die diep kant gegooi as ’n lyk in die baai gevind word.
Die eerste seisoen het verskeie benoemings gekry – waaronder vir Christie se spel by die Skotse BAFTA-toekennings. Die tweede seisoen het ’n reuse-kykertal ingeboesem wat in die miljoene strek. Dít het waarskynlik gehelp om die boontjietellers te oorreed om The Bay vir ’n derde én vierde seisoen te hernu.
Weeklikse episodes van seisoen drie vanaf Woensdag, 24 Augustus, om 23:00 op M-Net (DStv-kanaal 101), DStv Online of Catch Up.
Kyk ook die eerste twee seisoene nou op Showmax.
Soek jy nog misdaadreekse? Probeer ook Vigil, of The Pembrokeshire Murders, albei op Showmax beskikbaar.
