Vigil het ’n 84% kritici-gradering op Rotten Tomatoes, met Wall Street Journal wat dit as “een van die beter rillerreekse van die jaar” beskryf.
As ’n bemanningslid aan boord die kernduikboot HMS Vigil dood aangetref word, word ’n polisieondersoek van stapel gestuur.
Speurder Amy Silva (BAFTA-wenner Suranne Jones van Gentleman Jack) en Speurder Kirsten Longacre (BAFTA-wenner Rose Leslie van Game of Thrones en The Good Fight) lei die ondersoek ter see én op land.
Terwyl Silva sukkel om samewerking van die Vigil se bemanning te kry, kry die kyker ’n blik op haar verlede wat in sarsies via terugflitse gedeel word. Nes Silva ter see, besef Longacre gou dat die bemanningslid se moord net die oortjies van die seekoei is. Mettertyd ontdek hulle saam-saam ’n sameswering wat tot in die oppergesagte van Brittanje se nasionale veiligheid-afdeling strek.
Vigil is deur dieselfde skeppers as die senutergende misdaadreeks Line of Duty vervaardig.
Vigil se ensemble-rolverdeling sluit ook ander sterre in, waaronder die Emmy-benoemde Stephen Dillane (Stannis in Game of Thrones). Anjli Mohindra (The Bodyguard), Connor Swindells (Adam in Sex Education) en BAFTA-benoemde Gary Lewis (Billy Elliot) verskyn ook.
Stroom vanaf 1 Maart.
