Dié vyf Suidooster-storielyne gaan omtrent die tonge vandeesmaand los hê:
1
Kate sukkel om haar ongehoorsame huurders in toom te hou, terwyl Chris se besluit om die huis te verkoop verdere onsekerheid by almal skep. Die skrif is egter nie aan die muur vir die huurders nie, want Kate besluit om die huis te koop. Maar dit kom teen ’n prys, want Kate stel streng reëls op en dan is die gort behoorlik gaar…
2
Lee-Ann sukkel steeds om die werklikheid van haar trauma te verwerk. Dít terwyl Debbie se hulp en wraakgedagtes olie op die vuur is. Geregtigheid het immers nie ’n swaard in die hand nodig nie…
3
Mo se ware gevoelens vir Siya kom vorendag, wat skokkende gevolge vir Ruiterbosch se geliefde pastoor het. Boonop daag haar broer, Jacques, op en hy ruik ’n rot. Gaan Siya die storm wat hom tref oorleef?
4
’n Swanger Kaashifa se droom om ’n fynproewer-restaurant oop te maak, veroorsaak konflik binne die Samsodien-gesin. En dan besluit Rhafiek boonop sonder haar medewete om volle beheer aan Nazeem oor te gee. Gaan Kaashifa haar eie gesondheid op die spel plaas soos Nazeem kortpaaie begin neem om die restaurant aan die gang te hou. Bianca vermoed ook onraad met Nazeem aan die stuur. Dit begin al hoe meer lyk dat Kaashifa se droom in ’n nagmerrie gaan ontaard.
5
Elana en Aiden snoer kragte saam om omgewingsbewustheid onder die gemeenskap te kweek. Maar hul poging op Ruitberbosch groener te maak, het ’n onverwagte nadelige uitwerking, veral op die Anker se besigheid. Soos hulle persoonlike en professionele uitdagings navigeer, ontdek Ruiterbosch se inwoners dat vooruitgang nie so eenvoudig is as wat dit lyk nie.
Suidooster word weeksdae om 18:00 op kykNET (DStv-kanaal 144) en 18:30 op kykNET&kie (DStv-kanaal 145) uitgesaai. Dit is ook op Catch Up, DStv Stream en Showmax beskikbaar.
