Kom ons praat ’n bietjie oor seks. Sommer ’n bietjie-baie. Die gesprekke in Sex in Afrikaans word gelei deur die kliniese sielkundige en seksuoloog Bradley Daniels soos hy allerlei onderwerpe met ’n paneel bestaande uit vier Afrikaanse paartjies en twee enkellopendes takel.
Daar is ook onderhoude met sekswerkers, swingers, dominatrixes, ’n fopdosser, ’n dungeon master (jy sal maar self moet kyk), mense wat soos babas aantrek vir hul seksuele plesier en ander wat vollengte latex-pakke verkies.
Daar wag ook sekspoppe, mummifikasie, en ’n opwip-sekswinkel in Parys (die een in die Vrystaat, mense). Naakte waarhede uit die monde van mense soos Loslyf-stigter, Joe Theron, en Luvland-eienaar, Patrick Meyer, word ook gedeel. Basically – as dit enigsens iets met seks te doen het, gaan jy dit in dié dokkie sien.
Die TV-aanbieder en -vervaardiger Rian van Heerden, bekend vir onder meer Wie Word ’n Miljoenêr?, is die reeks se skepper en verteller.
Vanaf 14 Februarie.
