Danksy Beatrice (Jolene Martin) se hardkoppigheid in Arendsvlei het sy amper nes Steve met ’n koeël in die kop gesterf. Ek kan nie wag vir die dag wanneer Rachel (Kim Syster) uitvind dat haar Ben Ten en sy jaloesie teenoor ’n tiener actually verantwoordelik is vir haar seun se dood nie. Ja, sy was reg, Adam (Clint Aplon) se moordenaar was Donderdagaand saam met haar in die vertrek, maar dit is beslis nie Beaty nie.
Ai, die liefde kan ’n mens darem blind maak. En Rachel gaan nie daarvan hou dat sy voor Beatrice vir die gek gehou is nie. Bompie beter elke aand sy gebede sê, want as Rachel uitvind, kan hy maar sy dae begin tel.
Ek hoop Beatrice het nou haar les geleer en dat sy van haar saviour complex sal vergeet. Mense soos Rachel verdien nie jou simpatie nie en sal nie twee keer dink voordat hulle jou ook vrek maak nie. Let it go, Beaty!
Diepe Waters
Intussen word die De Wet-huishouding in Diepe Waters heeltemal omgedol. Hoe creepy was dit nie toe die siek Damian (Luan Jacobs) vir Nina (Reze-Tiana Wessels) in haar slaap dophou en die nota op haar kussing los nie? Ek sou onmiddellik vir my ’n hotelkamer bespreek het, want daar is geen manier dat ek weer in daardie huis sou slaap nie.
Gelukkig kon Rose (Eloise Cupido) uiteindelik twee en twee bymekaar sit, maar is dit te laat vir Wim (Neels van Jaarsveld)? Noudat Damian hom ontvoer het, weet ’n mens nie tot wat hy in staat is nie.
Ongelukkig weet dominee Ben (Eric Bouwer) presies hoe ver Sanet (Nadia Valvekens) sal gaan om hul kerk te beskerm. En dit is nie iets wat hom opgewonde maak nie. Lyk my Sanet is ’n bietjie te vurig vir dié konserwatiewe dominee. Maar gelukkig pla dit nie vir ’n sterk vrou soos Sanet nie. Inteendeel – sy is gereed vir hierdie oorlog. Dít is meer as wat haar eksman Rossouw (Altus Theart) kan sê as dit by sy familie-gevegte kom. Pam (Tracey-Lee Oliver) hou haar verniet so katjie van die baan, Rossouw gaan haar nog vinnig terug aarde toe bring.
Kyk Diepe Waters Maandae tot Donderdae om 18:30 op kykNET (DStv-kanaal 144, ook aanlyn op DStv Stream). Dit is ook op Catch Up beskikbaar.
Suidooster
Ek het nog nooit gehoor mens gaan vir borsinplantings en word sonder jou smaak en reuk wakker nie. Maar dit het nou met (Kaashifa (Jawaahier Petersen) gebeur en ongelukkig plaas dit haar en Rhafiek (Irshaad Ally) se verhouding van vooraf in gevaar. Gaan Kaashifa haar restaurant bo haar huwelik kies? Of is hul verhouding sterk genoeg om hierdie storm te oorleef?
So gepraat van verhoudings, dinge raak al vuriger tussen Bianca (Simone Biscombe) en Riaan (Daniel Coetzee), maar misverstande kan groot moeilikheid veroorsaak!
Carlo (Jadon Booysen) en Lee-Ann (Portia Joel) begin uiteindelik hul voete vind, maar ’n onverwagte oproep verander alles.
Kyk Suidooster weeksdae om 18:00 op DStv-kanaal 144 (ook aanlyn op DStv Stream) of ná uitsending op Catch Up.
Binnelanders
Waar daar ’n rokie trek, is daar gewoonlik ’n vuur… Dít is presies hoe Ciska (Deoudoné van der Merwe) oor Brenda (Elisabeth Nisbet) voel.
Die nuwe seisoen (seisoen 14) skop hierdie week met ’n bang af. Iets maak nie heeltemal sin rondom Brenda se moederlike instink nie, maar almal betrokke is nie op dieselfde bladsy nie. Is Ciska verkeerd? Of wil Steve (Clint Brink) en Nicolette (Kate Roothman) net nie die gevaartekens raak sien nie?
Tertius (Reynardt Hugo) is al weer die laaste een om te hoor van Tracy (Melinda Viljoen) se nuutste verwikkelinge en blyplek, maar in ’n verrassende wending het dit toe vir hulle die antwoorde gegee waarna hulle al so lank soek.
Ná al die hartseer, kry Naomi (Je-ani Swiegelaar) en Louis (Germandt Geldenhuys) hul reënboog.
Karen (Luandri Reynders) hou haarself besig om van haar skuld en trauma te vergeet, maar slim vang altyd sy baas.
Binnelanders saai op weeksdae om 19:30 op kykNET (DStv-kanaal 144, ook op DStv Stream) uit. Episodes is ook ná uitsending op Catch Up beskikbaar.
