Ons het die inside scoop oor die grootste storielyne wat hierdie week in Diepe Waters, Binnelanders en Suidooster gaan uitspeel. Dié sepievoorskou het geen spoilers nie!
Diepe Waters
Jacques (Werner Coetser) probeer hard om die stukkie van sy gebroke hart op te tel nadat hy die liefde van sy liewe en hul baba verloor het. Maar met skelms soos Zelda (Sandi Schultz) en Gys (Justin Strydom) in jou binnekring is dit bitter moeilik om in vrede te rou. Vir dié twee is daar mos eintlik net twee dinge in die lewe wat belangrik is: mag en geld. Die res van die mense en verhoudings in hul lewens is collateral damage.
Sanet (Nadia Valvekens) verruil een vorm van verslawing vir ’n ander en ongelukkig is dit weer Karla (Daniélle Swanepoel) wat onder haar ma se selfsugtige optrede gebuk gaan. Meer as een persoon probeer vir Sanet waarsku, maar sy is hardkoppig en doen iets onverantwoordelik wat erge gevolge vir haar kan inhou.
Pam (Tracey-Lee Olivier) se geduld word hierdie week erg beproef. Asof sy nie al deur genoeg is nie, gebeur iets anders wat haar lewe nog meer in gevaar stel.
Johan (Liam Bosman) en Charity (Dané de Waal) besef dat hulle gevoelens vir mekaar het, maar nie alle gevoelens lei tot ’n verhouding nie.
Kyk Diepe Waters Maandae tot Donderdae om 18:30 op kykNET (DStv-kanaal 144, ook aanlyn op DStv Stream). Dit is ook op Catch Up beskikbaar.
Binnelanders
Tracy (Melinda Brink) is bekommerd oor haar baba en met Tertius (Reynardt Hugo) wat weg is, moet sy self ’n paar moeilike besluite maak.
Conrad (Hykie Berg) is ook bekommerd oor Tracy, maar is salig onbewus van die dinge wat haar snags wakker hou. Intussen probeer hy nou vir Steve (Clint Brink) oortuig dat Dawid (Deon Lotz) dalk Binneland se oplossing is. Maar iets sê vir Steve dat hy nie ’n wolf in skaapklere moet vertrou nie. En hy is reg!
Die gange gons ook met gerugte dat Karen (Luandri Reynders) dalk Dawid se volgende jong bokkie gaan wees, maar sy het ander dinge op haar brein soos die oulike Amerikaner wat in haar slaai krap.
Binnelanders saai op weeksdae om 19:30 op kykNET (DStv-kanaal 144, ook op DStv Stream) uit. Episodes is ook ná uitsending op Catch Up beskikbaar.
Suidooster
Gary (Craig Adriaanse) se gat raak al dieper, terwyl Nazeem (Irvine van der Merwe) nou behoorlik met sy kop smokkel. Gary mag dalk ’n guru in sy veld wees, maar hy het geen idee waarvoor hy homself inlaat nie. Nazeem het altyd ’n plan wat hy met ander deel en die regte plan wat hy vir homself hou.
Lee-Ann (Portia Joel) en Ty (Maurice Paige) se huwelik word beproef en liefde het ook sy perke.
Rhafiek (Irshaad Ally) en ’n paar van Ruiterbosch se inwoners pak ’n groot avontuur aan, maar dinge werk nie altyd uit soos wat jy hoop nie… En dan kan dit gevaarlik wees.
Kyk Suidooster weeksdae om 18:00 op DStv-kanaal 144 (ook aanlyn op DStv Stream) of ná uitsending op Catch Up.
