Sy, die Meeue en die Heilige Gees is ’n nuwe minireeks wat draai om Ingrid, ’n vrou wat omtrent enigiets kan laat werk. Maar om die enkelma van haar sesjarige dogter, Zoey, te wees, is die een ding waarop sy net nie ’n houvas kan kry nie. Met die hoop op ’n nuwe begin verhuis Ingrid en Zoey na Vishoek.
Ingrid, vertolk deur Simone Pretorius, is ’n ongewone ma, wat alles vir Zoey, vertolk deur Mila-Sofi Clasen, sal doen. Want iewers tussen alles wat sy vir haar kind opgeoffer het en haar desperate poging om dinge reg te doen, het sy begin glo dat goeie ma-wees iets is wat sy net harder moet probeer regkry.
Vishoek bring egter meer as net ’n verandering van omgewing. Tussen die see en die meeue, nuwe vriendskappe en ’n geloof wat ongemaklik maar aanhoudend aan haar kom sit, begin Ingrid se hart stadig oopgaan vir die moontlikheid dat sy nie alles self hoef te dra nie. Dat genade nie iets is wat verdien moet word nie. En dat geloof dalk minder gaan oor al die antwoorde hê, en meer oor die bereidheid om jou greep te verslap.
Ook in die rolverdeling is Evan Hengst, Cintaine Schutte, Albert Pretorius, Daneel van der Walt, Ira Blanckenberg en Marion Holm.
‘Ontdekkingsreis’
“Sy, die Meeue en die Heilige Gees is ’n ontdekkingsreis van ma-wees en bekering. Van identiteit en verlossing. Maar ook die aanvaarding dat ons beste somtyds nie genoeg is nie, en dat die opofferings wat ons vir ons kinders maak, nie hulle las is om te dra nie,” sê Chanel Muller, vervaardiger, skrywer en regisseur van die reeks.
Volgens Muller is die reeks nie daarop gemik om geloof te romantiseer of antwoorde voor te skryf nie.
“Hierdie is nie ’n verhaal oor openbaring nie, maar oor nabyheid en teenwoordigheid. Ingrid is nie ’n perfekte karakter nie. Sy is impulsief, hardkoppig, soms heeltemal uit haar diepte, maar sy is diep menslik. Ek hoop kykers herken iets van hulself in haar reis, of dit nou as ouer, kind of iemand op soek na genade is,” voeg sy by.
Sy, die Meeue en die Heilige Gees begin Dinsdag 29 September om 20:00 op kykNET, DStv-kanaal 144. Episodes sal ook op DStv Stream en Catch Up beskikbaar wees.
