kykNET se nuwe geselsprogram – Laataand by Rian – gaan heerlik woer-woer met jou speel. Want die gaste wat Rian van Heerden nooi om saam met hom oor ’n bord kos te gesels, gaan jou beslis nie sonder emosie laat nie. Jy gaan lag, interessante dinge leer en jou by tye dalk liederlik vervies vir sommige sy gaste, maar jy gaan hierdie kuiers geniet.
Rian is ook bekend vir onder meer Wie Word ’n Miljoenêr? en Sex in Afrikaans.
Die kuiers vind in Rian se eetplek, Delizioso, in Pretoria plaas. Daar is twee gaste in elke episode en die tweede gas is altyd ’n verrassing vir die eerste gas. Die eerste gas is iemand wat in die nuus is, met die tweede gas wat iemand buitengewoon is met die doel om die gesprekke in ’n ligte trant te hou. Een van die eerste episode se gaste is Gayton McKenzie, die gewese bankrower wat besigheidsman geword het en nou die president van die Patriotic Alliance is. Die tweede gas is Boet Schoeman, ’n bekende mampoerstoker uit Potchefstroom se wêreld. Boet, van Schoemanati-mampoer is al nege keeer as die nasionale mampoer-kampioen en twee keer as die witblitskampioen gekroon.
Rian sê . . .
“Ek loop al lank met die idee vir ’n laataand-geselsprogram. Ek dink gesprekke oor aktuele sake en gebeure in ’n gemaklike omgewing verseker dit wat saakmaak behoorlik bespreek word.”
Wanneer dit by die nuusmakers kom, is die gaste byvoorbeeld nie almal uit die politieke wêreld nie.
“Hierdie persone is juis gekies omdat ek oortuig is dat hulle ook nuus tydens die program sal maak,” sê Rian. En hy belowe dat hy prominent politiek gaan praat. Die remskoene is lankal deurgeslyt want Rian wil die land in rep en roer kry.
Vanaf Dinsdag, 4 Julie 2023, om 21:00 op kykNET (DStv-kanaal 144, ook aanlyn). Laataand by Rian is ook op Catch Up beskikbaar.
