Elke maand bring ons vir jou ’n opsommende voorskou oor al die drama, smart en skandale waarna jy op kykNET&kie se Turkse telenovela, My naam is Farah, wat na Afrikaans oorgeklank is, kan uitsien.
Maandag, 2 Desember
Tahir wys vir Farah die besigheid wat hy van Bekir oorneem. Daar lê hy sy hart aan haar bloot. Kaan trek sy klag teen Mehmet terug.
Dinsdag, 3 Desember
Farah probeer Gonul ompraat om nie met Kaan te trou nie. Bade besoek Mehmet en dit loop sleg af. Chaos breek uit in Tahir se restaurant wanneer iemand ʼn wapen uithaal.
Woensdag, 4 Desember
Tahir vertel vir Farah hoe hy as kind mishandel is. Mehmet daag by die hospitaal op met Sadullah wat ʼn skoot aftrek en Kerimsah val neer.
Donderdag, 5 Desember
Mehmet red Tahir se lewe. Immigrasiebeamptes daag by Farah se huis op. Tahir neem ʼn belangrike plek in tydens Ali Galip se vergadering.
Maandag, 9 Desember
Farah trek by Tahir in om seker te maak dat hul huwelik eg voorkom. Die Akinci’s verwelkom vir Gonul, en daar is ʼn opwindende verwikkeling in Bade en Mehmet se verhouding.
Dinsdag, 10 Desember
Farah is baie opgewonde oor die skenker se aankoms. Tahir lewer ʼn roerende toespraak vir die immigrasiebeamptes. Bekir se gewete laat hom nie met rus nie.
Woensdag, 11 Desember
Kerim droom hy hardloop in ʼn groot tuin rond. Hy vertel later vir Farah ʼn man het hom in sy droom genader en dat dié vir hom soos sy regte pa gevoel het.
Donderdag, 12 Desember
Farah word amper ontvoer, maar iemand tree onverwags op om die situasie te beheer. Dít affekteer die hele Akinci-familie.
Maandag, 16 Desember
Tahir kry die beeldmateriaal waana hy soek, maar dit word by hom afgevat tydens ʼn polisie-padblokkade. Orhan oorhandig die hardeskyf aan Ali Galip.
Dinsdag, 17 Desember
Mehmet probeer Farah oorreed om hom te help om Ali Galip vas te trek, maar sy is bang dat Tahir sal uitvind wie Kerimsah se skenker vermoor het.
Woensdag, 18 Desember
Kaan en Gönül het planne om te trou, en nooi hul ouers vir aandete in ʼn restaurant. Die aand ontaard vinnig in ʼn nagmerrie.
Donderdag, 19 Desember
Tahir en Mehmet werk deur ʼn polisiedossier op soek na ʼn verdagte. Bade laat Mehmet verstaan hoe sy voel. Vera en Ali Galip het ʼn woordewisseling terwyl Farah wegkruip.
Maandag, 23 Desember
Mehmet luister ʼn gesprek tussen Ali Galip en Ohran af en hoor dat hulle mekaar iewers gaan ontmoet. Die prokureur in Iran bel vir Tahir met die nuus dat Farah se eksman nog lewe.
Dinsdag, 24 Desember
Tahir kry ʼn oproep van Farah se eksman. Hy sê hy gaan binnekort Istanbul toe te kom. En hy wil Farah in Iran terughê sodat sy die prys vir haar sondes kan betaal.
Woensdag, 25 Desember
Farah en Tahir besoek Ali Galip en Vera op Tahir se verjaarsdag, waar Farah aankondig dat hulle Frankryk toe gaan verhuis. Ali Galip vra Bade uit oor haar verhouding met Mehmet.
Donderdag, 26 Desember
Ali Galip vind ʼn afluisterapparaat en is op die oorlogspad. Hy maak kontak met Behnam. Farah ontglip vir Haydar en ry saam met Bade om Mehmet te gaan sien.
Maandag, 30 Desember
Almal voel die naskokke van die aanval op Farah en Bade, maar dis onseker wie daarvoor verantwoordelik was. Farah vrees vir haar, Tahir en Kerim se toekoms.
Dinsdag, 31 Desember
Die dag van die troue breek aan. Farah maak ʼn plan sodat sy en Bade vir Mehmet kan ontmoet, maar Tahir sien hulle en ʼn bakleiery volg. Tahir besluit om Farah, Bade en Mehmet te help.
My naam is Farah word Maandae tot Donderdae om 20:00 op kykNET&kie (DStv-kanaal 145) en DStv Stream uitgesaai. Dit is ook ná uitsending op Catch Up beskikbaar.
