In Mevrou Fourie & Kie, ’n nuwe Afrikaanse komedie wat eersdaags op kykNET begin uitsaai, besluit Anita Fourie (Henriëtta Gryffenberg) om van haar man, tandarts Barend (Deon Coetzee), te skei. Haar tydsberekening is egter aaklig. Sien, hul dogter, Melissa (Luandri Reynders), los ook net dan haar man, Quintin (Arno Greeff), nadat sy van sy ontrouheid uitvind. Op soek na stabiliteit trek sy terug huis toe. Maar dít gebeur nes Anita self probeer om haar eie lewe weer op koers te kry. En dis nie al nie – Anita se ma, Tina (Elzabé Zietsman), daag ook onverwags op ná sy uit die ouetehuis geskop is.
Jip, dis chaos…
