Die eerste episode van DAM se tweede seisoen is vanaf 16 Februarie op Showmax beskikbaar. Daarna sal nuwe episodes weekliks op Donderdae beskikbaar wees om te stroom.
Die reeks is deur die viermalige SAFTA-wenner, Alex Yazbek, geskep, met die eerste seisoen wat in 2021 vrygestel is. Die eerste seisoen tel dan ook onder die top-10 reekse met die meeste kykers op Showmax in 2021. Dit het ook die meeste benoemings vir ’n dramareeks by die 2022 SAFTA-toekennings ontvang.
Vir die tweede seisoen keer Lea Vivier en Pallance Dladla terug as Yola en Themba. Natasha Loring hervat ook haar rol as Yola se suster, Sienna. Loring het ’n SAFTA vir dié vertolking gewen.
Met die aanvang van die tweede seisoen is dit drie maande ná die gebeure van die Lentefees wat in die senutergende finale van die eerste seisoen afgespeel het. Dit lyk asof die kultusgroep se offerande gewerk het – reën het toe wel neergesak. Maar Yola onthou niks sedert haar terugkeer van haar pa se begrafnis nie. Kan sy die vermiste stukke bymekaar sit midde ’n dramatiese massagraf-ontdekking en ’n monster in die dam?
In die lokprent sien ons nog bekendes wat na die storie terugkeer, waaronder Antoinette Louw, Tarryn Wyngaard en Faniswa Yisa. Daar’s natuurlik ook Laudo Liebenberg as Rudy en Francis Chouler as Dirk, wie se liefdesdriehoek met Sienna hierdie seisoen nog meer ingewikkeld raak.
Kyk ook DAM S1 op Showmax.
