In Showmax se nuutste oorspronklike reeks, Blood Psalms, blyk die einde van dae op hande te wees. In die eerste lokprent vir dié aksiebelaaide fantasiereeks – ’n ko-produksie met CANAL+ – sien ons hoe bloed mildelik verspil word, als in die soeke na mag. Die storie speel af in Kemet, in Antieke Afrika, sowat ’n duisend jaar ná die val van Atlantis. Die geboorte van prinses Zazi (vertolk deur Bokang Phelane, Isidingo) bring egter ook ’n profesie: die einde van dae sal op haar 18de verjaardag begin ontvou.
Die reeks is ’n “herverbeelding van onsself as Afrikane, as ’n antwoord op die vraag ‘wie is ons?’,” sê Phelane. “Dit is op ’n baie vermaaklike manier gedoen, met baie drama en aksie.”
Die reeks sal vanaf 28 September met weeklikse episodes op Showmax uitgesaai word.
Die skeppers is Layla Swart en Jahmil X.T. Qubeka van Yellowbone Entertainment. Hulle was ook verantwoordelik vir Suid-Afrika se inskrywing vir die 2020-Oscars, Knuckle City. Dié boksdrama was die mees bekroonde rolprent by die 2020 SAFTA’s, waar dit ses toekennings gewen het.
“Wat ons probeer doen, is om die kontinent se geskiedenis vanuit ’n Afrika-perspektief te herwin,” sê Swart.
“Blood Psalms put uit elemente van ’n menigte Afrika-mitologieë en kyk na verskeie verskillende stamme in die eerste seisoen – die Akachi, die Uchawi, die Ku’ua, die Chini en Groot Nziwemabwe – soos hulle suid van Kemet (nou Egipte) migreer en hul kulture vorm.”
Mothusi Magano, wenner van vier SAFTA’s, speel Zazi se pa, die van-sy-kop-af-mal koning Letsha. Gomora– en Knuckle City-ster Zolisa Xaluva is Generaal Toka, die hoof van Letsha se Akachi-weermag.
“Blood Psalms is ’n moerse rit en dit is nog nooit vantevore gedoen nie,” is Magano dit eens. “Vir Afrikane gaan ons geskiedenis meestal 200 jaar terug. Dit is wat ons gegee is, en dit is vanuit Westerse perspektiewe. Ons weet regtig niks van ons eie geskiedenis nie. So Blood Psalms stel baie vrae en gee mense baie om oor na te dink.”
Sterbelaaide rolverdeling
Onder die fantasiereeks se talentvolle spelers tel die SAFTA-wenners Bongile Mantsai (Knuckle City), Hamilton Dlamini (Five Fingers For Marseilles), Hlubi Mboya (Isidingo), Siv Ngesi (DAM), Richard Lukunku (Happiness Is A Four-Letter Word), Thando Thabethe (Reyka), Zikhona Sodlaka (The Wife), Faniswa Yisa (DAM), Faith Baloyi (Flatland) en Thabo Rametsi (Kalushi, Silverton Siege).
Ook in die rolverdeling is Sello Maake kaNcube (The Herd) wat op die uitsluitlike gebruik van Afrikatale in die reeks as ’n hoogtepunt wys.
“Een ding wat vir ons briljant was, was geen gebruik van ’n Engelse woord, hoegenaamd nie,” sê Maake kaNcube. “Dit was ’n groot uitdaging, selfs vir baie akteurs. Die meeste van die tyd is ons gewoond daaraan om ’n mengsel van Afrikatale en Engels te doen. Hierdie keer is die dialoog net in Afrikatale.”
