Koppestamp is kykNET se nuwe rugbyspeletjiesprogram en, nes rugby, is dié kompetisiereeks ’n spansport.
In elkeen van die 13 episodes ding twee spanne met twee deelnemers elk in ’n rits verskillende speletjies teen mekaar mee om soveel moontlik punte op die telbord te kry. Die wenners van dié reeks gaan R200 000 in hul sak kan steek.
Vasvraspeletjies, raai-raai en soms ’n goeie skeutjie geluk maak van elke episode ’n pretgevulde avontuur.
Adrian Steyn (Getroud met Rugby) en Deoudoné van der Merwe (Horisonne) is die aanbieders van die program wat rugbyliefhebbers se kennis oor die sport op die proef stel.
Vanaf Woensdag, 26 Julie 2023, op kykNET (DStv-kanaal 144, ook aanlyn) om 20:00. Koppestamp is ook op Catch Up ná die uitsending beskikbaar.
