Gentleman Jack is ’n historiese romantiese dramareeks. Die reeks is gegrond op die dagboeke van die Victoriaanse era lesbiese grondeienaar en nyweraar Anne Lister.
Die hoofrol van Anne word deur Suranne Jones vertolk. Sy is wyd geloof vir haar spel in albei seisoene (jy kan die eerste seisoen op Showmax kyk).
Die nuwe seisoen begin in 1834, ’n maand ná Anne en Ann (Sophie Rundle) se private huwelikseremonie, met Anne wat Shibden Hall vir Ann se aankoms voorberei. Maar Anne se voormalige liefde, Marianna (Lydia Leonard), blyk ’n oënskynlike stok in die wiel vir hul planne te wees. Daarmee saam begin koerante oor Anne se seksualiteit te bespiegel.
The Guardian beskryf Gentleman Jack as “’n meesterstuk” terwyl Metro UK dit as een van die mooiste reekse van die jaar bestempel. “Visueel is dit een van die mooiste dinge waarna jy die hele jaar sal kyk. Van die sorgvuldig vervaardigde tydperkkostuums, versier met krulle en korsette, tot die pragtige Yorkshire-tonele, wat die reeks help om soveel sjarme te behou.”
Kyk weeklikse episodes op M-Net (DStv-kanaal 101), DStv Online en Catch Up.
