Menu terloops
In Features [28 Feb 2023]

Evan Hengst oor sy gehate ‘Suidooster’-karakter, Dirk, uit die dood herrys


Aanhangers van die bekroonde kykNET-sepie ‘Suidooster’ is onkant betrap toe ’n gehate karakter as’t ware uit die dood opgestaan het.

Kyk nou

Evan Hengst oor sy gehate ‘Suidooster’-karakter, Dirk, uit die dood herrys

In Dinsdag se episode het Dirk, wat deur Evan Hengst vertolk word, weer in Ruiterbosch, die fiktiewe Kaapse woonbuurt waar Suidooster afspeel, opgedaag. Dirk was deel van ’n onwettige orgaanhandelnetwerk, waarvan sy ma, die gevreesde Esther Graaff (Marion Holm), een van die sleutelfigure was.

In dié spannende storielyn, wat verlede jaar uitgesaai is, is Dirk tydens ’n polisieklopjag geskiet. Daar is toe die indruk vir kykers geskep dat dit noodlottig was… Toe nou nie. Terwyl almal gedink het hy sit in die hiernamaals, was hy eintlik besig om die polisie te help om die hart van die orgaanhandelnetwerk oop te vlek.

Ook ’n slagoffer

Volgens Evan was Dirk ’n marionet van sy ma en was hy eintlik net nóg een van haar slagoffers.

“Dirk was nooit ’n wreedaard nie, maar sy narsissistiese ma het hom manipuleer om na haar pype te dans,” sê Evan.

“Nou het hy ’n tweede kans in die lewe gekry. Hy wroeg egter baie om homself vir sy medepligtigheid te vergewe. Hy wil vir die mense wie hy leed aangedoen het vierkantig in die oë kyk om sy berou uit te spreek.” 

Suidooster se publisiteitsbestuurder, Wilmer Müller, sê dat Dirk se koms baie ou wonde gaan oopkrap.

“Soos die legkaart oor Dirk se vormingsjare in plek val, gaan kykers dalk simpatie vir Dirk ontwikkel. Maar daar wag verrassings met nóg spoke uit Ruiterbosch se donker verlede wat hul opwagting maak,” sê hy.

Al dié kinkels beloof glo om vorige omstrede storielyne – soos die poligamie-storielyn van AB (Cedwyn Joel) en Farah (Lee-Ann van Rooi), Ian (Abudraghman Adams) wat tot ‘n val gekom het, Bridgette (Denise Newman) en Donovan (Marvin-Lee Beukes) se troue, asook Jerome (Danny Ross) se skielike dood, te oorskadu.

Suidooster
Evan Hengst vertolk die rol van Dirk in Suidooster. Hy het skielik weer sy verskyning gemaak ná kykers geglo het hy is doodgeskiet. Foto: Verskaf

Suidooster is verlede jaar by die SAFTAS as die land se beste sepie aangewys. Dit word op weekdae om 18:00 op kykNET (DStv-kanaal 144) en om 18:30 op kykNET & kie (kanaal 145) gewys. Dit is ook op DStv Online en Catch Up beskikbaar om te stroom.

Wat, waar en wanneer?

Ons kies en keur die beste plaaslike en internasionale sepies, reeks en flieks om nou op Showmax, DStv en Netflix te kyk.

Sien ook Meer

Jy sal hou van:

Jou kykgids vir ‘Boer soek ’n vrou’ se 16de seisoen

Dit als begin met ’n brief... Hier is wat jy in elke episode van die nuwe seisoen van die maatsoekreeks 'Boer soek ’n vrou', vanaf Donderdag, 18 Julie 2024 op kykNET, kan verwag.

Meer

Die onverbiddellike houvas van Jake Gyllenhaal se ‘Presumed Innocent’

'Presumed Innocent', ’n nuwe misdaadreeks op Apple TV+ met Jake Gyllenhaal in die hoofrol, is ’n rit deur troebel waters van geregtigheid en verraad – ’n rit wat jy eerder nie moet misloop nie.

Meer

Redakteurskeuse vir Julie 2024: Trefferreeks ‘Elite’ se finale seisoen, ’n robot vir jou trane in meesleurende ‘Sunny’, en nog

Wat om te kyk: Die finale seisoen van die Netflix-treffer ‘Elite’, ’n manjifieke Kate Winslet in ‘The Regime’ en ’n troos-robot in ‘Sunny’ tel onder my keur van TV-vermaak vir vandeesmaand se redakteurskeuse.

Meer

Jou ‘Skemergrond’-gids vir Julie 2024

Ons ontmoet die mense van Gemoedsdrif, en sommer in die eerste episodes is daar reeds nuwe romanse, ’n bakleiery en iemand se verlede wat kom spook. Dít en nog meer is waarna ‘Skemergrond’-kykers in Julie kan uitsien. Hier is ons handige kykgids.

Meer
Sien alle opsies