‘Diepe Waters’: Dié was die 5 grootste storielyne van 2024

In geen spesifieke volgorde – hier is die grootste storielyne en oomblikke van vanjaar in Diepe Waters afgespeel het. 

Lettie en Henry se troue

Op 20 Maart het Lettie (Stephanie Baartman) en Henry (Stiaan Bruwer) uiteindelik hul ewige liefde aan mekaar verklaar. Die pad na hul groot dag was egter nie sonder drama nie… Madam Fifi het met die trouringe weggedwaal, wat chaos veroorsaak het. Gelukkig is sy betyds opgespoor, en die troue het sonder verdere voorvalle plaasgevind. Die dag was gevul met liefde, lag en trane, terwyl hul geliefdes die pragtige geleentheid saam met hulle gevier het.

Mari veroorsaak groot drama

Mari (Diandra Slabbert) kon nooit vrede maak met die verhouding tussen haar pa, ds. Ben (Eric Bouwer), en Sanet (Nadia Valvekens) nie. Hoewel sy vroom voorgekom het, het sy tot die uiterstes gegaan om hulle uitmekaar te dryf. Sy het valse gerugte oor Sanet versprei en selfs so ver gegaan as om Sanet te bedwelm. Haar planne is egter betyds in die kiem gesmoor, en sy is na haar oom en tannie se rehabilitasiesentrum in Potchefstroom gestuur.

In November het Mari haar slinksheid weer voortgesit nadat Sanet haar verlowing met Ben verbreek het. Sy het amper daarin geslaag om Sanet valslik te laat skuldig lyk aan die dood van ’n voetganger. Gelukkig het die waarheid in die hof na vore gekom – Mari was eintlik verantwoordelik vir dié ongeluk. Sy is skuldig bevind en moet nou haar vonnis in ‘n psigiatriese hospitaal uitdien.

Zelda en Gys vind mekaar weer

Vir jare was Zelda (Sandi Schultz) en Gys (Justin Strydom) vyande, maar ’n gedwonge samewerking aan ’n projek in Augustus het ou herinneringe laat opvlam. Kykers het toe uitgevind dat hulle ’n romantiese geskiedenis deel. Tydens hul werk saam het die vonke weer gespat, en hul liefde het herleef – op die mees onwaarskynlike plek: ’n stukkende hysbak. Hierdie hartroerende storielyn het gewys dat ware liefde altyd ’n kans verdien.

Sanet en Wim se affair – en Wim se tragiese dood

Sanet en Wim (Neels van Jaarsveld) het mekaar ondersteun as rehabiliterende alkoholiste wat persoonlike pyn moes verwerk. Hul vriendskap het vinnig in ’n intense affair ontwikkel, en hulle het oor ’n toekoms saam begin droom. Maar hul geluk was kortstondig. Op pad lughawe toe, waar Wim sy vrou, Rose, vir ’n egskeiding sou vra, het hy tragies in ’n motorongeluk gesterf. Sanet is verpletter, nie net oor sy dood nie, maar oor die verlies van die liefde wat sy nie openlik kon treur nie.

Theresa se amperse verdrinking

Theresa (Mandi Baard) het na Boskruin gekom om ’n nuwe lewe te begin en haar gewelddadige man, Wessel (Francois van Rensburg), agter te laat. Nadat sy uiteindelik van hom kon skei en ’n nuwe verhouding met Jacques (Werner Coetser) begin het, het die spook van haar verlede teruggekeer. Wessel het haar ontvoer en probeer verdrink in die Swartmarlyne se swembad. Jacques het egter op die nippertjie opgedaag en Theresa se lewe gered. 

Kyk Diepe Waters Maandae tot Donderdae om 18:30 op kykNET (DStv-kanaal 144, ook aanlyn op DStv Stream). Dit is ook op Catch Up beskikbaar.