Een is geen vreemdeling wanneer dit by TV-reekse kom nie en die ander is ’n jong man met ’n inspirerende lewensverhaal, en vandeesweek maak Marijke Coetser en Caleb Swanepoel hulle buiging as deel van Diepe Waters se permanente rolverdeling as René en Lucas, ’n ma en seun.
Marijke is veral bekend vir haar rol as Maryke in Getroud met rugby. Caleb, wat in 2015 sy been in ’n haai-aanvaal verloor het, het al alles van Shakespeare op die verhoog tot romantiese flieks gedoen.
Hulle vertel ons meer oor wat ons van hul karakters kan verwag.
Marijke, vertel ons meer van René.
“René is ’n enkelma en haar hele lewe draai om haar seun. Sy het baie seergekry toe sy in haar twintigs was en loop met ’n groot geheim rond. Sy is ’n sterk vrou, is fiks en lewe gesond. Sy wy haar lewe aan haar seun, Lucas, se swemloopbaan. René wil net die beste vir hom hê. Sy is hardwerkend en het ’n sagte hart, maar sy laat nie sommer iemand te na aan haar toe nie.”
Caleb, jy het al Shakespeare op die verhoog gedoen, in flieks gespeel en nou ’n telenovela. Wat geniet jy die meeste van hierdie nuwe hoofstuk in jou lewe?
“Dis baie opwindend om deel van hierdie rolverdeling en storielyn te wees. Só ook om vir die eerste keer deel van ’n langformaat-reeks te wees. Om in Johannesburg te woon, is ook vir my ’n nuwe ervaring, aangesien ek nog altyd in die Wes-Kaap gewoon het.”
Marijke, waarna het jy die meeste verlang om voor die kamera te wees?
“Om in ’n nuwe, uitdagende karakter te klim en om deel te wees van ’n familie by die werk. Om amper elke dag te kan speel en my passie uit te leef, om te groei in ’n nuwe karakter en lewe daarin te blaas, is iets waarna ek gesmag het.”
Caleb, jy is Engelssprekend, hoe jy voorberei om Lucas te speel?
“Ja, ek is Engelssprekend, maar ek het in Prins Albert grootgeword. Ek was in Afrikaanse skole en het heelwat Afrikaanse vriende. Om voor te berei, het ek baie met hulle in Afrikaans gepraat en ook baie Afrikaanse reekse en flieks gekyk. Die spelers en span agter die kameras, het my baie gehelp om my voete te vind. Nou praat ek elke dag Afrikaans en dis ’n baie goeie ervaring. Ek leer elke dag nuwe woorde.”
Vertel ons meer van Lucas.
“Hy is 21 jaar oud, ’n talentvolle swemmer en kom van Durban. Maar hy en sy ma trek Johannesburg toe sodat hy sy rehablitasie daar kan doen ná ’n traumatiese gebeurtenis. Sy pa is dood toe Lucas nog baie jonk was… Altans, dít is wat sy ma vir hom vertel.
Caleb, wat is jou lewensleuse?
“Bly nuuskierig. Dit laat jou vrae vra en na antwoorde soek. Ook om dag vir dag te lewe. Dit is iets waarmee ek soms kan sukkel, maar ek probeer fokus op die hier en nou.”
Marijke, wat geniet jy die meeste om saam met Caleb te werk?
“Om daardie oomblikke saam met hom te vind; daardie oomblikke wat elke toneel lewe gee en spesiaal maak. Ons kom baie goed oor die weg en dis so lekker om saam met Caleb in ons karakters te groei en dit met so ’n fantastiese storielyn. Dis ongelooflik. Ons is gemaklik met mekaar en het ’n band gevorm wat ons help om teenoor mekaar te speel en die storie te vertel.”
Kyk Diepe Waters Maandae tot Donderdae om 18:30 op kykNET (DStv-kanaal 144, ook aanlyn op DStv Stream). Dit is ook op Catch Up beskikbaar.
