Ruan (30) is ’n skaap-, bees- en saaiboer van Tweespruit, Vrystaat, en is een van die tien boere wat liefde in die 17de seisoen van kykNET se maatsoekreeks Boer soek ’n vrou wil vind. Hy hoop om ’n vroulike pasmaat te ontmoet.
Ruan is ’n eerstegenerasie-boer wat saam met sy pa boer. Ruan sou agt jaar gelede nooit kon dink dat hy eendag sou boer nie, alhoewel hy nog altyd ’n liefde vir die grond gehad het en gewens het hy kon boer.
Toe koop hulle hierdie vervalle plaas waar alles van meet af aan oorgedoen moes word om die plaas weer produktief te kry. Vandag is dit wel die geval.
Dié stadsjapie het sy lus vir die blink liggies verloor en kan nie gou genoeg terugkeer plaas toe na ’n besoek aan die stad nie. Hy erken die stadslewe kan hom nogal grumpy maak, maar ten spyte daarvan dat hy hardkoppig ook is, glo hy wel hy is ’n maklike mens om oor die weg mee te kom.
“Ja, ek is baie picky. Ek is al baie gesê ek is vol nonsens, maar ek weet wat ek wil hê. Ek wil nie jou tyd mors nie, en ek wil nie my tyd mors nie.”
Hy besef ook dat liefde nie net sal gebeur nie. Dis iets waarmee jy moeite moet doen en aan moet werk.
“Ek glo in liefde, want waar daar liefde is, is daar hoop,” en hy hoop ook om sy kinders op hierdie plaas te sien grootword.
Só beskryf hy homself:
Lojaal, geduldig (op die plaas), spontaan, netjies en avontuurlustig.
Belangstellings:
Dié boer kan fyn mik met sy pyl en boog, maar is ook gek oor bootry, oefen, sport en soos dit enige boer wat sy sout werd is, betaam – braai.
Wil jy vir ’n boer skryf?
Diegene wat vir een van die hubare boere ’n brief wil skryf moet ouer as 21 wees en ongetroud, geskei of ’n weduwee/wewenaar wees. Inskrywings moet voor middernag op 20 November ingedien word.
Persone wat die boere beter wil leer ken, kan dit op een van die volgende maniere doen:
- Besoek www.kyknet.tv
- Bel die vervaardigers, Wolflight, by 079 614 2229
- Stuur ’n e-pos na boer@wolflightsa.com
- Besigtig die boere se profiele op die Afrikaanse maatsoek-app, KOER
- Voornemende pasmaats sal ook briewe of pakkies per koerier vir die boere kan stuur na een van dié twee adresse: Boer soek ’n vrou, Postnet 211, Privaatsak X15, Somerset-Wes 7129 OF
Boer soek ’n vrou, Coronation-laan 11, Somerset-Wes 7130.
Digitale inskrywings, wat ook deur ’n video vergesel kan word, is welkom.
Wanneer is dit op die kassie?
Reandi Grey bied vir die eerste keer Boer soek ’n vrou aan. Dié maatsoekreeks sal vanaf Augustus 2025 op kykNET uitgesaai word.
