Reinier (29), ’n saai-, bees- en skaapboer van Frankfort, Vrystaat, is een van die tien boere wat liefde in die 17de seisoen van kykNET se maatsoekreeks Boer soek ’n vrou wil vind. Hy soek na ’n vroulike pasmaat.
Reinier is die sesde geslag op die familieplaas en sê behalwe vir sy ouers wat hy eerste gesien het, is sy vroegste herinnering aan die groen trekker wat sy oupa hom in die hand gestop het.
As klein seuntjie aan die voete van sy pa en oupa, het hy een begeerte gehad: om sélf daai groot trekkers te bestuur.
“Ons as boere is na aan die Here, want alles wat ons doen, is afhanklik van Hom.”
Reinier is op soek na liefde, en dit is waaraan hy sy rykdom wil meet.
“Ware rykdom is jou vrou en jou kinders,” sê hy.
Hy erken ook dat hy baie lief daarvoor is om te gee, en die liefde is al so opgebottel in hom dat dit nou tyd raak om oopgedraai te word.
“Ek soek nie ’n spark of ’n vlam nie – ek soek ’n veldbrand,” sê Reinier. Is dit dalk jy?
Só beskryf hy homself:
Hardwerkend, eerlik, lewenslustig, goedhartig en nederig.
Belangstellings:
Reinier is gek oor alles wat met gewere gepaardgaan, maar hy kan ’n gholfstok ewe lekker swaai. Visvang, motorfietse en boer is sy lewe.
Wil jy vir ’n boer skryf?
Diegene wat vir een van die hubare boere ’n brief wil skryf moet ouer as 21 wees en ongetroud, geskei of ’n weduwee/wewenaar wees. Inskrywings moet voor middernag op 20 November ingedien word.
Persone wat die boere beter wil leer ken, kan dit op een van die volgende maniere doen:
- Besoek www.kyknet.tv
- Bel die vervaardigers, Wolflight, by 079 614 2229
- Stuur ’n e-pos na boer@wolflightsa.com
- Besigtig die boere se profiele op die Afrikaanse maatsoek-app, KOER
- Voornemende pasmaats sal ook briewe of pakkies per koerier vir die boere kan stuur na een van dié twee adresse: Boer soek ’n vrou, Postnet 211, Privaatsak X15, Somerset-Wes 7129 OF
Boer soek ’n vrou, Coronation-laan 11, Somerset-Wes 7130.
Digitale inskrywings, wat ook deur ’n video vergesel kan word, is welkom.
Wanneer is dit op die kassie?
Reandi Grey bied vir die eerste keer Boer soek ’n vrou aan. Dié maatsoekreeks sal vanaf Augustus 2025 op kykNET uitgesaai word.
