Evert (38) is ’n makadamia-, sitrus- en wildboer van Tshipise, Limpopo is een van die tien boere wat liefde in die 17de seisoen van kykNET se maatsoekreeks Boer soek ’n vrou wil vind. Hy wil graag ’n vroulike pasmaat ontmoet.
Plaas, familie, geloof, vriende, mense wat die pad saam met jou stap. Dís wat vir Evert belangrik is. Hy is, as hy dit reg het, die vyfde generasie op die plaas.
Sy voorouers het in 1916 hier aangekom met hul ossewa, en sy oupa is op ’n sementblad in ’n tweevertrekhuisie op die plaas gebore – en tog het hulle ’n sukses van die boerdery gemaak. Hy is baie trots op wat hulle tot stand gebring het, en hoop dat sy voorouers ook trots op sy suksesse sal wees.
Hy vertel dat hy logistiek, oftewel toevoerkettingbestuur, aan die universiteit studeer het. Tydens sy eerste onderhoud daarna, wou die persoon weet hoekom juis toevoerkettingbestuur.
“It’s the sexiest thing in the world,” was sy antwoord, want dit verbind iets wat iewers nutteloos is met ’n plek waar iemand dit wil hê. En hulle is die ketting wat daardie rol speel.
Nou soek hy na iemand om saam met hom verder te bou. Maar dit gaan iemand verg met geduld, want die pad vorentoe is nie altyd maklik nie. “Jy moet kan vasbyt wanneer dinge skeefloop.”
Hy sê hy het baie liefde om te gee, en hy geniet sy lewe geweldig. Nou soek hy net iemand om dit saam met hom te geniet.
Oop en eerlike kommunikasie, in goeie en slegte tye, is vir hom belangrik. Maar die grootste faktor wat in ag geneem sal word, is of hulle dieselfde geloof deel.
“Liefde kan pret wees as jy dit pret maak,” laat hy later hoor.
Só beskryf hy homself:
Aktief, avontuurlustig, ’n goeie sin vir humor.
Belangstellings:
Natuurbewaring, fiksheid, lees, reis, klassieke vuurwapens en snacks.
Wil jy vir ’n boer skryf?
Diegene wat vir een van die hubare boere ’n brief wil skryf moet ouer as 21 wees en ongetroud, geskei of ’n weduwee/wewenaar wees. Inskrywings moet voor middernag op 20 November ingedien word.
Persone wat die boere beter wil leer ken, kan dit op een van die volgende maniere doen:
- Besoek www.kyknet.tv
- Bel die vervaardigers, Wolflight, by 079 614 2229
- Stuur ’n e-pos na boer@wolflightsa.com
- Besigtig die boere se profiele op die Afrikaanse maatsoek-app, KOER
- Voornemende pasmaats sal ook briewe of pakkies per koerier vir die boere kan stuur na een van dié twee adresse: Boer soek ’n vrou, Postnet 211, Privaatsak X15, Somerset-Wes 7129 OF
Boer soek ’n vrou, Coronation-laan 11, Somerset-Wes 7130.
Digitale inskrywings, wat ook deur ’n video vergesel kan word, is welkom.
Wanneer is dit op die kassie?
Reandi Grey bied vir die eerste keer Boer soek ’n vrou aan. Dié maatsoekreeks sal vanaf Augustus 2025 op kykNET uitgesaai word.
