(Hooffoto: Gys Loubser)
Vir Marciel Hopkins, die aanbieder van die 16de reeks van kykNET se gewilde maatsoekreeks Boer soek ’n vrou, is liefdesbriewe iets wat deesdae baie skaars is.
“Maar om iemand se woorde in jou hande vas te hou en dit in te neem, is ’n kosbare oomblik wat nie maklik is om te beskryf nie,” sê sy.
Die eerste sarsie briewe word afgelewer
Eerste aan die beurt is Quintus (39). Hy kan nie help om te wonder of hy een van die vyf boere gaan wees wat die meeste briewe ontvang nie. Hy erken onsekerheid en twyfel het beslis in sy kop kom rondskrop.
Annelize van Kroonstad laat hom dadelik dink sy’s iemand met ’n sagte hart.
Corlea se kort video, getiteld Corlea soek vir jou . . . beïndruk hom ook en die drietal jong manne in skooldrag waarsku hom met “Quintus, jy weet nie wat ons weet nie!” en die res van haar kollegas vertel hom dat hy nie verder hoef te soek nie.
Daandré (26) volstaan by sy vertroue in die Here om hom te lei na waarnatoe hy moet beweeg. En hy glo 100% sy trouvrou is in die sak vol briewe wat Marciel kom aflewer het.
Gaan dit dalk Renate wees wat op soek is na iemand om diep lief te hê? Sy beskryf Daandré as iemand met ’n nederigheid in sy oë en ’n sagte stem. Hy is effe uit die veld geslaan en weet nie mooi hoe om daarop te reageer nie.
Op haar beurt het Sonja vir Daandré ’n potloodskets van homself gestuur. Ook gedigte uit haar eie pen.
Marciel sê vir Daandré sy wil ernstig met hom praat oor Boer soek ’n vrou – maar weer eens word alles net daar in die lug gelaat.
Goeie nuus
Quintus kan nie langer wag om te hoor wat Marciel vir hom te sê het nie. Sy skop af met die slegte nuus: “Jy gaan tien teen een nie vanaand baie slaap nie, want jy gaan deur al hierdie briewe moet lees,” en daarmee word daar nog twee sakke wat boepens staan van briewe vir hom ingedra.
Hy gaan een van die deelnemers wees wat amptelik op die blitsafsprake gaan.
“Is ek nou top-5?”, wil hy weet en skud sy vuiste triomfantelik in die lug. Ja, dié boer is opgewonde! Maar hy het net 24 uur om deur die briewe te gaan om 10 moontlike maats te kies, en Marciel raai hom aan om hulp in te roep.
Kollega Reinier en buurman Kosie is byderhand om broodnodige hulp, en waarskynlik ook ’n bietjie raad, te verleen.
Was daar genoeg briewe vir die boer van Brits?
Daandré was opgewonde om op die blitsafsprake te gaan. Maar ook vir hom moet Marciel die nuus deel dat daar nie genoeg briewe in die sak was nie… Marciel, die platjie, het hom egter ’n streep getrek!
Drie sakke vol briewe word ingedra en sy sê: “Dis nou amptelik. Jy gaan blitsafsprake toe!”
Hy is baie verras, juis omdat hy nie seker was of hy selfs tien briewe sou ontvang nie. Vir hom voel dit soos ’n droom dat daar werklikwaar meisies daarbuite is wat van hom hou – en wie weet, dalk sy trouvrou kan wees.
Vriende CJ en Lodewyk se hulp is ingeroep om te help met die briewe deurlees en die top-10 te kies.
Nog briewe!
Jacques (27), die man wat bekend is vir sy kwinkslae, is volgende aan die beurt. Hy is baie opgewonde toe hy die sak vol briewe sien wat Marciel kom aflaai het.
Miné van Pretoria skryf dat sy dadelik deur die sonskyn wat hy uitstraal, vasgevang is en dat sy besef het sy moet hom ontmoet. Kan dit wees dat hierdie woorde die boer laat bloos?
Maar het Suleen self haar saak by Jacques gekelder deur ’n video te deel waar sy haar hond vashou? “Nee, f*k, die hond gaan nie plaas toe kom nie!” kom dit laggend van hom.
Marciel wil by hom weet watter een van die twee meisies moet hulle bel. Sy’s slaggereed met haar slimfoon om die regte knoppie te druk, al gooi Jacques verwoed wal.
Dis toe Miné wat antwoord. En ’n gloeiende Jacques, sonder enige slim grappies, gesels ewe bedees met haar.
Sit neer die foon
Marciel stel Jacques gerus dat hy nie weer die meisies hoef te bel nie. Hy het ander werk om te doen, en dis om 10 van hulle te kies vir blitsafsprake.
Dis vir hom ’n baie oorweldigende gevoel toe die besef insink dat hy deel van die top-5 deelnemers gaan wees.
Vriend Leroy en buurvrou Cara sit gretig handjie by met die lees en sorteer van briewe, alhoewel Leroy teleurgesteld voel dat nie een van die briefskrywers vir hulle biltong gestuur het nie.
Skok!
By Hendri (32) se plaas is daar twee groot sakke briewe wat afgelaai word. Maar daar’s ’n skok-aankondiging: Hy gaan onttrek. Maar vir die beste rede ooit – hy het iemand ontmoet!
Hy het wel genoeg briewe ontvang om met die proses voort te gaan, maar Hendri is baie beslis – hy het sy spanmaat gesoek en hy het haar gekry. Laggend erken hy dat hy baie verlief is. En die twee sakke word teruggelaai in die bakkie.
Sakke, sakke en nog sakke
Niel (31) erken hy het sleg geslaap in afwagting op Marciel se besoek en die impak wat dit op sy lewe vorentoe kan hê.
Hy kon sy oë nie glo toe een na die ander sak vol briewe die leefvertrek ingebring word nie. In ’n stadium lyk hy soos ’n vlakhaas wat in die kollig vasgevang word en hy erken sy hart klop nou teen 120 slae per minuut!
Niel het inderdaad die meeste briewe van die seisoen ontvang. En sy vriend André en skoonsuster Nicole is slaggereed om saam met hom deur die honderde briewe te werk.
Geskiedkundige oomblik vir die Wes-Kaap
Gaan JW (24) se huis nog leeg bly of is daar ’n liggie in die tonnel? Hy sê dis vir hom ’n baie spesiale en warm gevoel wat hy binne homself kry nadat hy van die briewe gelees het en ervaar het hoe mense hom sien.
Marciel vertel vir hom dat jonger boere wat vir Boer soek ’n vrou inskryf, nog nooit genoeg briewe ontvang het om met die proses voort te gaan nie. Dit is hoofsaaklik omdat die ouderdomsgroep so klein is en briefskrywers mag nie jonger as 21 wees nie.
Maar JW het meer as die kwota ontvang – ’n hele paar sakke word ingedra!
Om hom deur die briewe te help werk, maak hy staat op sy suster Alicia en een van sy vriende, DJ.
Die top-5 boere is dus:
- Niel (30) van Dannhauser, KwaZulu-Natal het die meeste briewe ontvang
- Quintus (39) van Winburg, Vrystaat
- Jacques (27) van Venterstad, Oos-Kaap
- Daandré (26) van Brits, Noordwes
- JW (24) van Villiersdorp
Boer soek ’n vrou (S16) word vanaf Donderdagaand, 18 Julie 2024, om 20:00 op kykNET en DStv Stream (DStv-kanaal 144) uitgesaai. Episodes is ook op Catch Up ná uitsending beskikbaar. Ons recaps word weekliks ná afloop van die program, omstreeks 21:00, gepubliseer.
